Májilis zańsyz kiristerdi zańdastyrýǵa qarsy is-qımyldy kózdeıtin jobany maquldady
ASTANA. 4 sáýir. QazAqparat -Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qarjy mınıstri Bolat Jámishevtiń aıtýynsha, Konstıtýtsııalyq Keńes Úkimetke zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zańdy quqyqtyq pozıtsııaǵa sáıkes keltirýdi qarastyratyn zań jobasyn Parlamentke engizý týraly usynys jasaǵan. Soǵan oraı, zań jobasymen zańsyz jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy qujattardaǵy olqylyqtardy joıý kózdeledi.
«Zań jobasymen birqatar operatsııalardyń shekti somalarynyń mólsherin ulǵaıtý qarastyrylady. Atap aıtqanda klıenttiń basqa tulǵanyń paıdasyna aqysyz negizde júzege asyratyn tólemderi men aqsha aýdarymdary 2 mln. teńgeden 6 mln, teńgege, mádenı qundylyqtardy satyp alý-satý, elimizge ákelý nemese áketý 7 mln. teńgeden 30 mln. teńgege deıin, qarjylyq lızıng kelisimi boıynsha múlik alý nemese berý 7 mln. teńgeden 30 mln, teńgege deıin, mindetti memlekettik tirkeýge jatatyn jyljymaıtyn jáne basqa múlikpen mámileler 45 mln. teńgeden 150 mln. teńgege deıin ulǵaıady», - deıdi B. Jámishev.
Sondaı-aq, qujat boıynsha qarjylyq monıtorıngke jatatyn tizimdi qysqartý da kózdeledi.
Zań jobasy ekinshi oqylymda talqylanatyn bolady.
