Májilis zańsyz kiristerdi zańdastyrýǵa qarsy is-qımyldy qamtıtyn zań jobasyn maquldady
ASTANA. 25 sáýir. QazAqparat - Búgin QR Parlamenti Májilisiniń jalpy otyrysynda palata depýtattary
«Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Qujatty ekinshi oqylymǵa ázirleý barysynda depýtattar birqatar túzetýler engizdi. Atap aıtqanda, shaǵyn, orta jáne iri bıznes sýbektileriniń sanattaryna jatatyn zańdy tulǵalarǵa arnalǵan aıyppul sanktsııalarynyń mólsheri qaıta qaraldy. Quqyq qoldaný praktıkasynda advokattyq qyzmetpen aınalysýǵa arnalǵan lıtsenzııanyń qoldanysyn toqtata turý jónindegi quqyqtyq olqylyqtar joıyldy. Budan bólek, depýtattar qolma-qol valıýtany Qazaqstan Respýblıkasynyń shekarasy arqyly ákelý-áketý kezinde qarjy monıtorıngine jatatyn somany azaıtý jónindegi normany alyp tastady.
Májilis maquldaǵan zań jobasy Parlament Senatyna jiberiledi.
