Májilis zańsyz alynǵan kiristerdi zańdastyrýǵa qarsy zań jobasyna Senat engizgen ózgeristermen kelisti
ASTANA. 31 mamyr. QazAqparat - Búgin Májilis Tóraǵasy Nurlan Nyǵmatýlınniń tóraǵalyǵymen ótken palatanyń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa jáne aqshany qolma-qol aqshaǵa aınaldyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi talqylap, qujatty qabyldady.
Eske sala keteıik, atalǵan qujat Konstıtýtsııalyq Keńestiń 2009 jylǵy 20 tamyzdaǵy zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zań normalaryn quqyqtyq pozıtsııaǵa sáıkes keltirý týraly tapsyrmasyna sáıkes ázirlengen.
Bul rette, zań jobasynyń basty nysany ony qabyldaǵan kezde zańnamadaǵy oryn alyp otyrǵan kemshilikterdi, qaıshylyqtardy joıý bolyp tabylady. Al qujattaǵy túzetýler advokattar oryndaıtyn konstıtýtsııalyq mańyzdy mıssııamen olar úshin zańnamamen engizilip otyrǵan óz klıentiniń kúdikti qarjylyq mámileleri týraly ókiletti organǵa habarlaý mindeti arasyndaǵy tartysty boldyrmaıtyn quqyqtyq tetikterdi bekitýge baǵyttalady. Budan bólek, uıymdar men tulǵalardy terrorızm men ekstremızmdi qarjylandyrýmen baılanysty uıymdardyń tizbesinen shyǵarý tetikterin bekitý kózdeledi. Sonymen qatar, zań jobasymen qarjy monıtorıngi sýbektileriniń ishki baqylaý erejelerine qoıylatyn talaptary da rettelip otyr. Qarjy monıtorıngine jatatyn kúdikti operatsııany toqtata turý tártibi de naqtylanǵan.
Al Májilis maquldaǵan qujatqa Senat 6 túzetý engizgen bolatyn. Bulardyń basym bóligi redaktsııalyq naqtylaý sıpatynda jáne zań jobasynyń tujyrymdamasyn ózgertpeıdi.
