Májilis: Zańnamalyq aktilerge mádenıet máseleleri boıynsha ózgerister engizý týraly zań jobasy jumys tobynyń alǵashqy otyrysynda talqylandy
ASTANA. QazAqparat - Búgin Májiliste «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» zań jobasy jumys tobynyń alǵashqy otyrysynda talqyǵa salyndy.
Aıta ketý kerek, bul ótken saılanym depýtattarynyń bastamashylyǵymen ázirlengen zań jobasy bolatyn. Palata qyzmetiniń merziminen buryn toqtatylýyna baılanysty zań jobasy boıynsha jumys tobynyń birneshe otyrysy ótkenmen, Májiliste maquldanbaı qalǵan edi.
Endi, mine, VI saılanymdaǵy Májilistiń Áleýmettik-mádenı damý komıteti atalǵan zań jobasyn qaıtadan qolǵa aldy. Jańadan qurylǵan jumys tobyna jetekshilik etý mindeti Bekbolat Tileýhanǵa júkteldi.
Jumys tobynyń alǵashqy otyrysynda sóz alǵan Áleýmettik-mádenı damý komıtetiniń hatshysy, zań jobasy bastamashylarynyń biri Maıra Aısına atalǵan qujat boıynsha qandaı jumystar júrgizilgenin, zań jobasynyń maqsatyn jan-jaqty baıandap berdi. Osy zań jobasymen Ákimshilik quqyq buzýshylyq týraly kodekske jáne «Mádenıet týraly» zańǵa túzetýler engizilýi qarastyrylyp otyrǵanyn jetkizdi. Zańnamadaǵy qaıshylyqtardy joıý, Qazaqstanda tsırk ónerin damytýǵa quqyqtyq jaǵdaılar jasaý maqsaty kózdelip otyr.
Qarjy shyǵystaryn talap etetin birqatar túzetýler qorytyndy alý úshin Úkimettiń qaraýyna jiberilgen.
Depýtat Nurtaı Sabılıanov burynǵy saılanymda qaralǵan usynystar men túzetýler qaıtadan talqylaýdan ótýi qajet ekenin atap ótti. Úkimettiń oń qorytyndysyn alǵan tolyqtyrýlar da pysyqtalatyn bolady.
Bekbolat Tileýhan bul zańnamalyq aktiniń mańyzdylyǵyna toqtala kelip, áriptesterin osy zań jobasyn talqylap, jan-jaqty jetildirýge belsendi qatysýǵa shaqyrdy.
Jumys tobynyń kelesi otyrysy 14 sáýir, beısenbi kúni, ótetin bolyp belgilendi.
