Májilis zańnamadaǵy olqylyqtardy, jemqorlyqqa jol beretin normalardy joıýǵa baǵyttalǵan qujatty maquldady
ASTANA. 8 mamyr. QazAqparat -Búgin Parlament Májilisinde palata depýtattary «Qazaqstan Respýblıkasynyń keıbir zańnamalyq aktilerine ártúrli zańnamalyq aktilerdiń quqyq normalary arasyndaǵy qaıshylyqtardy, olqylyqtardy, kollızııalardy jáne sybaılas jemqorlyq quqyq buzýshylyqtar jasaýǵa yqpal etetin normalardy joıý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Májilis maquldaǵan zań jobasy Parlament Senatyna joldanady.
Qujat elimizdiń quqyqtyq saıasat tujyrymdamasyn iske asyrý maqsatynda ázirlengen. Bul rette qoldanystaǵy zańnamany eskirgen jáne bir-birin qaıtalaıtyn normalardan aryltý, quqyqtyq retteýdegi olqylyqtardyń ornyn toltyrý, qoldanylyp júrgen quqyqtyń ishki qaıshylyqtardy joıý qajettigi atap kórsetilgen bolatyn. Osyǵan baılanysty zań jobasymen 33 zańnamalyq aktige túzetý engizý kózdelgen. Atap aıtqanda, Іshki ister mınıstrligine memlekettiń áleýmettik sıpattaǵy tótenshe jaǵdaılarda áreket jasaýynyń quqyqtyq tetigin belgileýge baǵyttalǵan 13 zań aktisine túzetý engizý usynylady. Sonymen qatar, sybaılas jemqorlyq quqyq buzýshylyqtardyń jasalýyna yqpal etetin normalardy alyp tastaý qarastyrylady.
