Májilis vıtse-spıkeri Ázerbaıjan Mıllı Medjlısiniń tóraıymymen kezdesti

BAKÝ. QazAqparat - Májilis tóraǵasynyń orynbasary Balaıym Kesebaeva Bakýde ótip jatqan Ekonomıkalyq yntymaqtastyq uıymy Parlamenttik Assambleıasynyń úshinshi Bas konferentsııasy aıasynda Ázerbaıjannyń Mıllı Medjlısiniń tóraıymy Sahıba Gafarovamen kezdesti, dep habarlaıdy QazAqparat.

Júzdesýde baýyrlas halyqtar arasyndaǵy ózara yntymaqtastyq máseleleri talqylandy.

B.Kesebaeva dıplomatııalyq qarym-qatynastyń 30 jylynda eki el arasynda senimdi jáne ashyq saıası dıalog ornaǵanyn atap ótti.

Májilis tóraǵasynyń orynbasary bizdiń memlekettegi Qazaqstan Prezıdentiniń basshylyǵymen qolǵa alynyp jatqan aýqymdy saıası, áleýmettik, ekonomıkalyq reformalarǵa toqtalyp, Konstıtýtsııalyq ózgerister engizýge qatysty bastamaǵa aıryqsha nazar aýdardy.

– Olardyń barlyǵy Parlamenttiń rólin kúsheıtýge, saılaý júıesin jetildirýge, jergilikti basqarý, sot jáne quqyq qorǵaý organdary júıesin damytýǵa baǵyttalǵan, – dedi B.Kesebaeva.

Taraptar energetıka, kólik jáne logıstıka, aýyl sharýashylyǵy salalaryndaǵy yqpaldastyqty, parlamentaralyq baılanysty tereńdetý máselelerin talqylady.

Sondaı-aq, B.Kesebaeva Ázerbaıjannyń Mıllı Medjlısi tóraıymynyń orynbasary Adıl Alıevpen kezdesý ótkizdi.