Májilis uıymdasqan qylmystyq toptyń yqpalyna «tosqaýyl» qoıýǵa baǵyttalǵan zań jobasyn maquldady
ASTANA. 18 mamyr. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine uıymdasqan qylmysqa qarsy is-qımyl máseleleri boıynsha tolyqtyrýlar men ózgerister engizý týraly» zań jobasyn birinshi oqylymda maquldady.
Zań jobasy Memleket basshysynyń 2009 jylǵy 6 naýryzdaǵy Joldaýyn iske asyrý boıynsha jalpyulttyq is-sharalar josparyn oryndaý maqsatynda ázirlengen. Bul rette qujatta uıymdasqan qylmysqa qarsy is-qımyldyń, onyń bolýyna arnalǵan qarjy kózderiniń jolyn kesýdiń, memlekettik qyzmetshiler men ózge de adamdardyń oǵan qatysý faktilerin túp tamyrymen joıýdyń jańa nysandary men ádisteri engiziledi.
Budan bólek, uıymdasqan qylmystyq toptar, uıymdasqan qoǵamdastyqtar, transulttyq uıymdasqan qylmystyq toptar jasaıtyn zańǵa qarsy áreketter úshin qoldanylatyn jazalar qataıtylady. Bul rette qujatty qabyldaý uıymdasqan qylmysqa jáne transulttyq uıymdasqan qylmysqa tıisinshe memlekettik yqpal etýdiń keshendi júıesin qurýǵa múmkindik beredi. Olardyń memlekettik qyzmet pen ekonomıka salasyna yqpalynyń taralýyna «tosqaýyl» qoıady. Bundaı keshendi shara áleýmettik qaýipti qubylystyń kórinisterine qarsy qoǵamdyq aldyn alý jáne oǵan tózbeý sharalarynyń negizin qalaıtyn bolady.
Birinshi oqylymda maquldanǵan zań jobasy ekinshi oqylymǵa ázirleý úshin palatanyń Bas komıtetiniń tapsyrylady.
