Májilis úıinde Qazaqstannyń bilim berý salasynyń búgini men bolashaǵyna arnalǵan kórme ashyldy

Bul kórmeni QR Bilim jáne ǵylym mınıstrligi uıymdastyrdy, dep habarlaıdy QazAqparat.

Úkimet saǵatynyń aldynda QR Bilim jáne ǵylym mınıstri Janseıit Túımebaev Májilis depýtattaryna kórmeni tanystyrdy. Májilis depýtaty Svetlana Ferho Úkimet saǵaty barysynda tanymdyq máni zor kórme uıymdastyrǵany úshin Janseıit Túımebaev myrzaǵa jáne ol basqaratyn Bilim jáne ǵylym mınıstrligine rızashylyǵyn jetkizdi.

«Balam deıtin eldiń bolashaǵy jarqyn» degen taqyryp boıynsha ázirlegen kórmede Memleket basshysynyń ókimimen qabyldanǵan baǵdarlamalar jáne aldaǵy atqarylatyn is-sharalar kórinis tapqan. Qazaqstan Respýblıkasynyń Prezıdenti Nursultan Nazarbaevtyń «Jastary jalyn júrekti, órshil namysty, bıik rýhty bolsa, ol eldiń eńsesi de bıik bolady» degen sózi jazylǵan tusta elimizdiń daryndy oqýshylarynyń halyqaralyq olımpıadalarda qol jetkizgen tabystary jaıly baıandalǵan.

2009 jyly Qazaqstan Germanııanyń Bremen qalasynda TMD elderi arasynda birinshi bolyp eń bedeldi ıntellektýaldyq jarys - 51-shi Halyqaralyq matematıkalyq olımpıadanyń estafeta-týyn qabyldap alǵany belgili. Halyqaralyq matematıkalyq olımpıada ústimizdegi jyly Astana qalasynda shildeniń 6-sy men 17-si aralyǵynda ótkiziledi.

Aıta ketý kerek, Halyqaralyq matematıkalyq olımpıada - orta mekteptiń joǵary synyptarynyń oqýshylaryna arnalǵan matematıkadan álem chempıonaty. Birinshi Halyqaralyq matematıkalyq olımpıada 1959 jyly Rýmynııada ótkizilgen. KSRO kezinde birneshe ret Máskeý qalasynda da atalǵan jarys bolyp ótti.

QR Bilim jáne ǵylym mınıstri Janseıit Túımebaevtyń buıryǵyna sáıkes 2009 jylǵy qyrkúıek aıynan bastap elimizdiń barlyq óńirlerinde Halyqaralyq matematıkalyq olımpıadaǵa daıyndyq júrgizilip keledi.

HHІ ǵasyrdaǵy úzdik ınteraktıvti tehnologııalardyń jetistikteri beıne túrinde kórsetildi. Onda Qazaqstan Respýblıkasynyń Memlekettik jalpyǵa mindetti bilim berý standarty men oqý baǵdarlamasyna sáıkes barlyq pánder boıynsha bir myń sabaq-flıpcharty ázirlengen. Flıpchart-sabaqtary veb-portalǵa qoıylady.

Sonymen qatar kórmede Tehnıkalyq jáne kásiptik bilim salasyn damytýdyń jaı-kúıine arnalǵan arnaıy taqta bar. Onda ekonomıkanyń suranysy boıynsha tehnıkalyq jáne kásiptik bilimdi jańartý, osy salany qarjylandyrý, jumyspen qamtý strategııasynyń iske asyrylýy úshin «Jol kartasy» baǵdarlamasy boıynsha mamandardy qaıta daıarlaý máseleleri qamtylǵan. Sol sekildi Tehnıkalyq jáne kásiptik bilim júıesindegi áleýmettik áriptestik jáne ınnovatsııa salalary negizinde atqarylatyn is-sharalar túzilgen.

Atalǵan kórme Májiliste ótip jatqan «Qazaqstan Respýblıkasynda bilim berýdi damytýdyń jaı-kúıi men bolashaǵy» degen taqyryptaǵy Úkimet saǵaty sheńberinde daıyndalǵan.