«Májilis úsh partııadan jasaqtalady» - respýblıkalyq basylymdarǵa sholý
***
Keshe Aqordada Memleket basshysy Nursultan Nazarbaev ıAdrolyq qarýdy taratpaý jáne qarýsyzdaný úshin parlamentshiler odaǵynyń jahandyq úılestirýshisi Alın Vareni qabyldady.Kezdesý barysynda ıadrolyq qarýsyzdaný jáne taratpaý salasyndaǵy halyqaralyq yntymaqtastyq máselesi talqylandy. «Sizderdiń qyzmetterińiz meniń jer betinde ıadrosyz álem qurý jónindegi ıdeıalarymmen tolyq sáıkes keledi. Men osy úderiske qatysýǵa daıynmyn jáne osy baǵytta is júzinde naqty qadamdarǵa baryp júrmin»,-dep atap ótti Nursultan Nazarbaev. Kezdesý barysynda kóterilgen máselelerdi «Egemen Qazaqstan» basylymynyń búgingi sanyndaǵy «Elbasy kóshbasshylyǵyna berilgen joǵary baǵa» atty materıaldan oqyńyzdar.
Sondaı-aq osy basylymynyń jazýynsha, keshe Ortalyq saılaý komıssııasy besinshi shaqyrylǵan Qazaqstan Respýblıkasy Parlamenti Májilisi depýtattarynyń kezekten tys saılaýynyń qorytyndylaryn jarııa etti.Ortalyq saılaý komıssııasynyń tóraǵasy Qýandyq Turǵanqulovtyń atap ótýinshe, elimiz boıynsha saılaýshylardyń tizimderine 9 303 699 saılaýshy engizildi. Olardyń ishinen 7 018 927 adam daýys berdi. Bul tizimge engizilgen saılaýshylardyń 75,4 paıyzyn quraıdy. Daýys berýge arnalǵan úı-jaılardan tys 178 385 saılaýshy daýys bergen. Ortalyq saılaý komıssııasynyń hatshysy Baqyt Meldeshovtiń keltirgen málimetterine qaraǵanda, saılaýda «Nur Otan» HDP saılaýshylardyń 80,99 paıyzyn, Qazaqstannyń «Aq jol» demokratııalyq partııasy 7,47, Qazaqstan Kommýnıstik halyq partııasy 7,19, paıyz daýs jınaǵan. Saılaý qorytyndylaryn jóninde tolyq málimet alǵyńyz kelse, «Egemen Qazaqstan» búgingi sanyndaǵy «Májilis úsh partııadan jasaqtalady» atty maqalany qarańyz.
***
«Lıter» basylymy búgingi sanynda «Búgingi saýal» aıdarymen jańa saılanǵan Májilis qyzmetine qatysty tanymal azamattardyń pikirlerin beripti. Qazaqstannyń qarjygerler qaýymdastyǵynyń tóraǵasy Serik Ahanovtyń aıtýynsha, Qazaqstan osy ýaqytta Eýropa elderiniń birqataryna áser etip úlgergen daǵdarystyń ekinshi tolqynynyń zardabyn sezinedi. Sondyqtan daǵdarysqa qarsy sharalardy erte bastan oılastyryp, áreket jasaý kerek. Bul máseleniń der kezinde sheshimin tabýy kóbine depýtattardyń jedeldigi men kásibıligine baılanysty bolmaq. Al eks-depýtat Maıra Aısınanyń aıtýynsha, birpartııaly Májilistiń ereksheligi onda partııalyq tártip bar bolatyn. Al jańa Májiliste burynǵyǵa qaraǵanda, pikir talastyrý kóp bolady. Óıtkeni «Aq jol» partııasynyń mindeti bıznestiń múddesin qorǵap, onyń memleket múddesiniń aldyna qoıýy kerek. Al kommýnıster saılaýshylarǵa tym kóp ýádeler berip qoıdy. Qalaı bolǵanda da Parlamentte jańa partııalardyń paıda bolýy qarama qaıshy pikirlerdiń mol bolýyna yqpal etedi.
***
«Kazahstanskaıa pravda» basylymy ulybrıtanııalyq baıqaýshy, Qazaqstan jónindegi Búkilpartııalyq, parlamentaralyq toptyń tóraǵasy lord Djon Ýeıverlıdiń elde ótken naýqanǵa joǵary baǵa bergendigin jazady. Baıqaýshynyń pikirinshe, Qazaqstan eldi demokratııalandyrý baǵytynan taıǵan joq. «Men Qazaqstan basshysynyń Jańaózende saılaý ótkizbeý jónindegi Konstıtýtsııalyq keńestiń sheshimine veto qoıýyn qoldaıtyndardyń qataryndamyn. 20 jyl ishinde Qazaqstan eldi demokratııalandyrý baǵytynda aýqymdy ister atqardy. Osy elde ótken kezekten tys saılaý Parlamentte bir emes birneshe partııanyń bolýyna jol ashty. Bul óz kezeginde zań shyǵarýshy organnyń qyzmetine tyń serpilis beredi degen oıdamyn»,-deıdi lord.Bul týraly «Kazahstanskaıa pravda» basylymynyń búgingi sanyndaǵy «Prozrachno ı demokratıchno» atty maqaladan oqyńyz.
