Májilis: Únemdelgen qarjyǵa jańa joldar salynady
ASTANA. QazAqparat - Parlament Májilisiniń jalpy otyrysynda Qaryz týraly kelisimge №2 túzetýlerge qatysty Qazaqstan men HQQDB arasyndaǵy kelisim-hatty ratıfıkatsııalaý týraly zań jobasyn maquldady, dep habarlaıdy QazAqparat.
«1056 shaqyrym bolatyn Qyzylorda jáne Ońtústik Qazaqstan oblystaryndaǵy ýchaskelerdi qaıta salý úshin negizgi qarajat týraly kelisimge 2009 jyly 13 maýsymda qol qoıyldy. Sonymen qatar 80 shaqyrym bolatyn Shymkent-Jambyl oblysy shekarasy jolyn salýǵa jańa ýchaske qosylyp, 2013 jyly 23 mamyrda qaryz týraly kelisimge qatysty №1 túzetýge qol qoıyldy. Qazirgi ýaqytta atalǵan ýchaskelerde qurylys jumystary aıaqtalyp, jol paıdalanýǵa berildi. Konkýrstyq rásimderdiń nátıjesi, sondaı-aq ulttyq valıýtanyń devalvatsııasynan keıin únemdelgen qarjy qaldy. Jalpy, únemdelgen soma 359 mln AQSh dollaryn qurady», - dep atap ótti QR Investıtsııalar jáne damý mınıstri Jeńis Qasymbek zań jobasy boıynsha baıandamasynda.
Onyń sózine qaraǵanda, Úkimet únemdelgen qarajat - 271,2 mln dollardy «Kúrti-Býrylbaıtal» (85 shaqyrym) jáne «Uzynaǵash -Otar» (96 shaqyrym) ýchaskelerin qaıta salýǵa jumsaýǵa sheshim qabyldady.
«Atalǵan qarajat uzyndyǵy 181 shaqyrymdyq asfaltbetondy tórt jolaqty joldy, 14 kómir men 181 sý ótkizgish qubyr qurylysyna jumsalatyn bolady. «Kúrti-Býrylbaıtal» jáne «Uzynaǵash -Otar» ýchaskeleriniń jobalaryn únemdelgen qarajat esebinen iske asyrý kózdelgen. Jobany júzege asyrý merzimi 2018-2020 jyldarǵa josparlanǵan», - dedi J. Qasymbek.
