Májilis ýly gazdar men bakterıologııalyq quraldarǵa tyıym salatyn qujatty maquldady
NUR-SULTAN. QazAqparat – Parlament Májilisiniń jalpy otyrysynda «Tunshyqtyratyn, ýly nemese basqa da uqsas gazdar men bakterıologııalyq quraldardy soǵysta qoldanýǵa tyıym salý týraly hattamany (Jeneva, 1925 jylǵy maýsym) ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
«Elbasy Nursultan Nazarbaev jappaı qyryp-joıý qarýyn paıdalanbaý, barlyq bıologııalyq zertteýlerdi tek beıbit maqsatta paıdalaný, halyqaralyq qaýipsizdikti nyǵaıtý boıynsha óz ustanymyn álemdik deńgeıde kóterip, naqty istermen dáleldedi. Qazaqstan bakterıologııalyq jáne ýytty qarýdy ázirleýge, óndirýge ári olardyń qoryn jınaqtaýǵa tyıym salý jáne olardy joıý týraly konventsııany buryn ratıfıkatsııalaǵan. Ýákiletti organ retinde 2007 jyly Bilim jáne ǵylym mınıstrligi bolǵan edi. Osy qabyldanǵan konventsııany tolyqtyratyn jáne nyǵaıtýshy elementter retinde sanalatyn Jeneva hattamasy bolyp otyr. Bul eki halyqaralyq qujat bir-birimen óte tyǵyz baılanysty. Usynylyp otyrǵan Jeneva hattamasy halyqaralyq qaýipsizdik júıesinde mańyzdy ról atqarady ári osy saladaǵy qajetti tetikterdiń biri bolyp sanalady. Atalmysh hattama 20 ǵasyrdyń basynda qabyldansa da, búginge deıin ol osy hımııalyq tunshyqtyratyn, ýly bakterıologııalyq quraldardy qoldanýǵa tyıym salatyn basty zańdy qujattyń biri bolyp tanyldy. Sondyqtan mınıstrlik Jeneva hattamasyn ratıfıkatsııalaý máselesin nazarǵa usynyp otyr», - dedi A. Aımaǵambetov.
Osy oraıda ol atalǵan qujat elimizdiń syrtqy saıasatynyń tujyrymdamasyna sáıkes keletinin atap ótti.
«Prezıdent Ákimshiliginiń jáne Qaýipsizdik Keńesiniń tapsyrmasy boıynsha Jeneva hattamasyn ratıfıkatsııalaý máselesi bizdiń mınıstrlikke júktelgen bolatyn. Qujattyń ǵylymı-quqyqtyq saraptamasyn ál-Farabı atyndaǵy Qazaq ulttyq ýnıversıteti júrgizdi. Osy saraptamaǵa sáıkes, Jeneva hattamasy Qazaqstannyń syrtqy saıasatynyń tujyrymdamasyna, sondaı-aq elimizdiń halyqaralyq sharttar týraly zańǵa tolyq kólemde sáıkes keledi», - dedi Ashat Aımaǵambetov.
