Májilis Ulttyq ulannyń mártebesine arnalǵan zań jobasyn maquldady
ASTANA. QazAqparat - Parlament Májilisinde «Qazaqstan Respýblıkasynyń Ulttyq ulany týraly» zań jobasy maquldandy.
Eske sala keteıik, Memleket basshysynyń «Qazaqstan Respýblıkasyndaǵy memlekettik basqarý júıesin odan ári jetildirý sharalary týraly» 2014 jylǵy 21 sáýirdegi Jarlyǵyna sáıkes, QR Ishki ister mınıstrliginiń ishki áskerleri ishki ister organdarynyń biryńǵaı júıesine kiretin QR Ulttyq ulany bolyp qaıta qurylǵan bolatyn. Tutastaı alǵanda, zań jobasynyń maqsaty Ulttyq ulannyń qyzmeti salasyndaǵy qoǵamdyq qatynastardy retteý bolyp tabylady.
«Zań jobasy Ulttyq ulannyń mártebesin, qyzmettik quqyqtyq negizderin, onyń mindetteri men ókildikterin aıqyndaıdy. QR Ulttyq ulanynda áskerı qyzmet ótkerý jáne eńbek qatynastary aıqyndalady. Ulttyq ulannyń áskerı qyzmetshileriniń, otbasylarynyń áleýmettik kepildikteri aıqyndalady», - dedi zań jobasy boıynsha baıandaǵan ishki ister mınıstriniń orynbasary Marat Demeýov.
Onyń aıtýynsha, zań jobasyn daıyndaý barysynda Reseı, Belarýs, Ázerbaıjan, Túrkııa, Nıderland, Frantsııa, Italııa, AQSh, Moldova sekildi elderdiń tájirıbesi qaralǵan.
