Májilis Ulttyq qordan kepildendirilgen transfertke qatysty qujatty maquldady

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń Ulttyq qorynan 2022 – 2024 jyldarǵa arnalǵan kepildendirilgen transfert týraly» zań jobasy maquldandy, dep habarlaıdy QazAqparat tilshisi.

«Zań jobasy Bıýdjet kodeksiniń 24 babyna sáıkes ázirlendi. Ulttyq qordan respýblıkalyq bıýdjetke beriletin kepildendirilgen transferttiń mólsherin 2022 jyly 2,4 trln teńge, 2023 jyly 2,2 trln teńge, 2024 jyly 2 trln teńgege belgileý usynylady. Kepildendirilgen transfertti respýblıkalyq bıýdjetten ortaq zeınetaqylardy tóleýge jáne memlekettik bazalyq zeınetaqy tólemderine baǵyttaý usynylady», - dedi QR Ulttyq ekonomıka mınıstri Áset Erǵalıev.

Budan buryn habarlanǵandaı, Májilis tóraǵasy Nurlan Nyǵmatýlın BAQ ókilderiniń oflaın formatta palatadaǵy is-sharalarǵa qatysýyna baılanysty pikir bildirdi.