Májilis Úkimettiń quzyretin bólýge baǵyttalǵan zań jobasyn maquldady
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń Úkimeti týraly» Qazaqstan Respýblıkasynyń Konstıtýtsııalyq zańyna ózgerister engizý týraly» Konstıtýtsııalyq zań jobasy ekinshi oqylymda maquldandy.
Atalǵan qujat aǵymdaǵy jyldyń 6 tamyzynda Memleket basshysynyń Úkimettiń keńeıtilgen otyrysynda júktegen tapsyrmalaryn oryndaýǵa jáne Prezıdenttiń 25 tamyzdaǵy Jarlyǵyn júzege asyrýǵa baǵyttalady.
Zań jobasynda el Úkimeti men ortalyq atqarýshy organdar, ortalyq atqarýshy organdar men jergilikti atqarýshy organdar arasyndaǵy quzyretti bólý kózdeledi. Úkimettiń, mınıstrlikter men olardyń vedomstvolarynyń, Úkimettiń quramyna kirmeıtin ortalyq atqarýshy organdardyń quzyretin naqtylaý bóliginde ózgerister engiziledi. Atap aıtqanda, Jarlyqty iske asyrý úshin memlekettik áleýmettik-ekonomıkalyq saıasatynyń, qorǵanys qabiletiniń, qaýipsizdiginiń, qoǵamdyq tártipti qamtamasyz etýdiń negizgi baǵyttaryn ázirleýdegi Úkimet quzyreti naqtylanady. Mınıstrlikter men Úkimet quramyna kirmeıtin ortalyq atqarýshy organdarǵa strategııalyq, retteý, iske asyrý jáne baqylaý-qadaǵalaý fýnktsııalaryn oryndaý, strategııalyq josparlar men baǵdarlamalardy iske asyrý boıynsha ókilettikter beriledi.
Sonymen qatar, mınıstrlikter vedomstvolaryna retteý, iske asyrý jáne baqylaý-qadaǵalaý fýnktsııalaryn júzege asyrý boıynsha normatıvtik-quqyqtyq aktilerdi bekitý fýnktsııalary beriledi.
Májilis maquldaǵan zań jobasy Parlament Senatyna joldanady.
