Májilis Úkimetpen birlesip sapaly zańdar qabyldaýy kerek - Baqtyqoja Іzmuhambetov
ASTANA. QazAqparat - Májilis Úkimetpen birlesip sapaly zańdar qabyldaýy kerek. Búgin Parlament Májilisiniń Tóraǵasy Baqtyqoja Іzmuhambetov palatanyń alǵashqy jalpy otyrysynda osylaı málim etti.
«Búgin Májilistiń altynshy shaqyrylymy zań shyǵarý jumysyna kiristi. Birinshi kezekte biz Májilistiń ókilettikterin iske asyrýdyń birinshi sessııaǵa arnalǵan negizgi sharalar josparyn qabyldadyq. Elbasymyz atap ótkenindeı, elimizdi túbegeıli jańǵyrtatyn aýqymdy isterdi, júzege asyrylyp jatqan Ult josparyn odan ári zańnamalyq qamtamasyz etý bizderge júkteldi. Biryńǵaı salyqtyq jáne kedendik kodeksti, jer qoınaýy men jer qoınaýyn paıdalaný kodeksin qabyldap, básekelestik, elektroenergetıka jáne memlekettik fýnktsııalardy básekeles ortaǵa berý salasyndaǵy zańnamany jetildirýimiz qajet», - dep atap ótti Májilis spıkeri.
Sonymen qatar, Tóraǵa ózin-ózi basqarý organdarynyń bıýdjetteri men menshigin tıimdi basqarýyn zańnamalyq qamtý máselesine toqtala kele, bul zań jobasy kúzde Májilistiń qaraýyna túsetinin atap ótti. Onyń aıtýynsha, Májilis depýtattary Úkimetti kútpesten osy zań jobasymen jumysty bastap ketken. Sonymen qatar, palatanyń qorjynynda qazirgi tańda jıyrmaǵa tarta zań jobasy bar.
«Sondyqtan da, barlyq uıymdastyrýshylyq máselelerdi shuǵyl túrde sheship, naqty zań shyǵarý protsesine belsene aralasýlaryńyzdy suraımyn. Barlyq parlamenttik fraktsııalar men depýtattyq toptar Úkimet jáne qoǵammen birlesip, jedel, kásibı jáne ashyq jumys istep, sapaly zańdar qabyldaýymyz kerek», - dedi B. Іzmuhambetov.
