Májilis Úkimet quzyretin naqtylaıtyn zań jobasyn birinshi oqylymda maquldady
ASTANA. QazAqparat - Búgin Parlament Májilisiniń jalpy palata depýtattary «Qazaqstan Respýblıkasynyń Úkimeti týraly» Qazaqstan Respýblıkasynyń Konstıtýtsııalyq zańyna ózgerister engizý týraly» zań jobasy birinshi oqylymda maquldady.
Atalǵan qujat aǵymdaǵy jyldyń 6 tamyzynda Memleket basshysynyń Úkimettiń keńeıtilgen otyrysynda júktegen tapsyrmalaryn oryndaýǵa jáne Prezıdenttiń 25 tamyzdaǵy Jarlyǵyn júzege asyrýǵa baǵyttalady.
«Zań jobasynda Úkimettiń, mınıstrlikter men olardyń vedomstvolarynyń, Úkimettiń quramyna kirmeıtin ortalyq atqarýshy organdardyń quzyretin naqtylaý bóliginde ózgerister engiziledi. Atap aıtqanda, Jarlyqty iske asyrý úshin memlekettik áleýmettik-ekonomıkalyq saıasatynyń, qorǵanys qabiletiniń, qaýipsizdiginiń, qoǵamdyq tártipti qamtamasyz etýdiń negizgi baǵyttaryn ázirleýdegi Úkimet quzyreti naqtylanady. Mınıstrlikter men Úkimet quramyna kirmeıtin ortalyq atqarýshy organdarǵa strategııalyq, retteý, iske asyrý jáne baqylaý-qadaǵalaý fýnktsııalaryn oryndaý, strategııalyq josparlar men baǵdarlamalardy iske asyrý boıynsha ókilettikter beriledi», - deıdi Ulttyq ekonomıka mınıstri Erbolat Dosaev.
Onyń aıtýyna qaraǵanda, mınıstrlikter vedomstvolaryna retteý, iske asyrý jáne baqylaý-qadaǵalaý fýnktsııalaryn júzege asyrý boıynsha normatıvtik-quqyqtyq aktilerdi bekitý fýnktsııalary beriledi.
