Májilis turǵyn úı qurylysyndaǵy úleskerler múddesin qorǵaıtyn zań jobasyn maquldady
ASTANA. QazAqparat - Búgin Májilistiń jalpy otyrysynda palata depýtattary «Turǵyn úı qurylysyna úlestik qatysý týraly» zań jobasyn birinshi oqylymda maquldady. Zań jobasy úleskerlerdiń quqyqtary men múddelerin qorǵaýǵa, úlestik turǵyn úı qurylysyna qatysýshylardyń qarym-qatynasyn retteýge baǵyttalǵan.
Buǵan deıin habarlanǵanymyzdaı, zań jobasynyń tujyrymdamasyna sáıkes, turǵyn úı qurylysyna úlestik qatysý boıynsha kepildikter berý úshin Turǵyn úı qurylysyna kepildik berý qoryn qurý qarastyrylady. Atalǵan kepildik berý Qory turǵyn úı ǵımaratynyń qurylysyn aıaqtaýǵa, úleskerler turǵyn úı ǵımaratyndaǵy úlesti berýge kepildik berýdi júzege asyrady, onyń jarǵylyq kapıtalyna memleket qatysyp, Úkimet sheshimi boıynsha aktsıonerlik qoǵamnyń uıymdyq-quqyqtyq nysanynda qurylatyn kommertsııalyq emes uıym bolyp tabylady. Sonymen qatar kepildik berý qory qarjylyq turatylyq pen tájirıbeniń bolýy boıynsha úlestik qurylysqa qatysýshylardyń biliktilik talaptaryn bekitedi. Úleskerler qarajatynyń nysanaly paıdalanylýyna baqylaý jasaý tetigin engizedi. Budan bólek, qurylys salýshylarǵa turǵyn úı ǵımaratyn salý tájirıbesinen bólek, menshik nemese memleket bergen jer paıdalaný quqyǵynda aýyrtpalyqsyz jer ýchaskesiniń bolýy, jobalyq-smetalyq qujattamanyń bolýy talap etiledi. «Jalpy alǵanda, úleskerlerdiń qarajatyn tartý qurylys salýshynyń óziniń jeke qarajaty esebinen turǵyn úı ǵımaratynyń qańqasyn turǵyzǵannan keıin ǵana múmkin bolady», - deıdi Ulttyq ekonomıka mınıstri Erbolat Dosaev. Sonymen qatar úlestik turǵyn úı qurylysynyń tıimdiligin qamtamasyz etý maqsatynda zań jobasymen Úkimettiń, jergilikti atqarýshy organnyń, ýákiletti organnyń quzyretteri belgilenedi. Birshama talqylaýdan soń Májilis depýtattary zań jobasyn birinshi oqylymda tujyrymdamaly túrde maquldaýdy qoldady. Qujat aldaǵy ýaqytta ekinshi oqylymǵa ázirlenetin bolady.
