Májilis turǵyn úı qatynastaryna arnalǵan zań jobasyn birinshi oqylymda maquldady

Atalǵan zań jobasy Memleket basshysynyń tapsyrmasyn oryndaý maqsatynda ázirlengen jáne memlekettik turǵyn úıge ıelik etý salasynda turǵyn úı zańnamasyn jetildirýge baǵyttalady. Atap aıtqanda, memlekettik turǵyn úı qoryn kommýnaldyq turǵyn úı qory, memlekettik kásiporyndardyń turǵyn úı qory jáne memlekettik mekemelerdiń turǵyn úı qory dep, olardyń arajigin ajyratý bóliginde turǵyn úı qatynastary zańnamasyn jetildirý kózdeledi. «Zań jobasyna keletin bolsaq, qoldanystaǵy zańnamada memlekettik kommýnaldyq turǵyn úı qory men memlekettik kásiporyndardyń qaramaǵyndaǵy turǵyn úıler ǵana memlekettik turǵyn úı qorynyń quramynda bolýy kózdeledi. Sonymen bir mezgilde, ortalyq atqarýshy organdar men basqa memlekettik mekemelerdiń balansynda memleketke tıesili turǵyn úıler barshylyq. Alaıda, menshiktiń osy túri zańnamada kózdelmegen», - dedi Qurylys jáne turǵyn úı kommýnaldyq sharýashylyq isteri agenttigi tóraǵasynyń orynbasary Nıkolaı Tıhonıýk zań jobasy jaıynda jasaǵan baıandamasynda.

Onyń aıtýynsha, jergilikti atqarýshy organdar beretin turǵyn úıler qyzmettik turǵyn úı nemese qyzmettik turǵyn úıge teńestirilgen turǵyn úı dep bólinedi. Bul rette olardyń quyqtyq mártebesinde eleýli aıyrmashylyqtar da belgilenip otyr. Sonymen birge, zań jobasy boıynsha memlekettik mekemelerdiń turǵyn úı qorynan qyzmettik turǵyn úı berý tártibi men sharttaryn naqtylaý, osyndaı úıdi jekeshelendirý tártibin anyqtaý, apatty úılerden azamattardy kóshirý problemasyn sheshý sharalary qarastyrylady. «Máselen, árbir mınıstrlikte óziniń turǵyn úı qoryn qurý usynylady. Jalpy, burynyraqta árbir mınıstrlikterde turǵyn úı qoryn ıelenetin memlekettik kásiporyn bolǵan. Bul kásiporyndardyń barlyǵy aktsıonerlik qoǵam bolyp quryldy da, turǵyn úı qory ákimdikterge berilgen edi. Endi osy qalpyna keltiriledi», dedi N. Tıhonıýk. Budan bólek, zań jobasy boıynsha baspanany óteýsiz jekeshelendirýge quqy bar azamattar sanaty naqtylanady. Negizinen bundaı quqyq buryn da bolǵan jáne 1992 jylǵy Mınıstrler kabınetiniń qaýlysymen bekitilgen edi. Sondyqtan da, jańa jobada bul quqyqtar júıelendiriledi. Máselen, Agenttik tóraǵasy orynbasarynyń aıtýynsha, memlekettik organdardyń usynysyna sáıkes, zań jobasynda turǵyn úıdi jekeshelendirýge shekteý qoıýlar de kózdelgen. Atap aıtqanda, belgilengen sanıtarlyq jáne tehnıkalyq talaptarǵa jaýap bermeıtin, áskerı qalashyqtardyń, shekara zastavalarynyń jáne ózge de jabyq nysandar aýmaǵynda ornalasqan, erekshe tabıǵı aýmaqtarda ornalasqan turǵyn úıler jekeshelendirýge jatpaıdy.