Májilis turǵyn úı qatynastaryn retteýge arnalǵan zań jobasyna Senat engizgen ózgeristerge kelisimin berdi

Esterińizge sala keteıik, atalǵan zań jobasy Memleket basshysynyń tapsyrmasyn oryndaý maqsatynda ázirlengen jáne memlekettik turǵyn úıge ıelik etý salasynda turǵyn úı zańnamasyn jetildirýge baǵyttalady. Atap aıtqanda, memlekettik turǵyn úı qoryn kommýnaldyq turǵyn úı qory, memlekettik kásiporyndardyń turǵyn úı qory jáne memlekettik mekemelerdiń turǵyn úı qory dep, olardyń arajigin ajyratý bóliginde turǵyn úı qatynastary zańnamasyn jetildirý kózdeledi.

Toqtala ketetin jaıt, qoldanystaǵy zańnamada memlekettik kommýnaldyq turǵyn úı qory men memlekettik kásiporyndardyń qaramaǵyndaǵy turǵyn úıler ǵana memlekettik turǵyn úı qorynyń quramynda bolýy kózdeledi. Sonymen bir mezgilde, ortalyq atqarýshy organdar men basqa memlekettik mekemelerdiń balansynda memleketke tıesili turǵyn úıler barshylyq. Alaıda, menshiktiń osy túri zańnamada kózdelmegen. Bul rette jergilikti atqarýshy organdar beretin turǵyn úıler qyzmettik turǵyn úı nemese qyzmettik turǵyn úıge teńestirilgen turǵyn úı dep bólinedi. Olardyń quyqtyq mártebesinde eleýli aıyrmashylyqtar da belgilenip otyr. Sonymen birge, zań jobasy boıynsha memlekettik mekemelerdiń turǵyn úı qorynan qyzmettik turǵyn úı berý tártibi men sharttaryn naqtylaý, osyndaı úıdi jekeshelendirý tártibin anyqtaý, apatty úılerden azamattardy kóshirý problemasyn sheshý sharalary qarastyrylady. Zań jobasynda turǵyn úıdi jekeshelendirýge shekteý qoıýlar da kózdelgen. Atap aıtqanda, belgilengen sanıtarlyq jáne tehnıkalyq talaptarǵa jaýap bermeıtin, áskerı qalashyqtardyń, shekara zastavalarynyń jáne ózge de jabyq nysandar aýmaǵynda ornalasqan, erekshe tabıǵı aýmaqtarda salynǵan turǵyn úıler jekeshelendirýge jatpaıdy.

Májilis maquldaǵan zań jobasyna Parlament Senaty naqtylaý sıpatyndaǵy eki túzetý ǵana engizgen.