Májilis transferttik baǵa belgileý týraly jobaǵa Senat engizgen ózgeristermen kelisti
ASTANA. Mamyrdyń 5-i. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda palata depýtattary «Transferttik baǵa belgileý týraly» QR Zańyna ózgerister men tolyqtyrýlar engizý týraly» zań jobasyna Parlament Senaty engizgen túzetýlerdi talqylap, ol boıynsha kelisimin berdi,
dep habarlaıdy QazAqparat.
Esterińizge sala keteıik, atalǵan zań jobasynyń negizgi maqsaty transferttik baǵa belgileýdi baqylaý tetigin odan ári jetildirý bolyp tabylady. Toqtala ketetin jaıt, mundaı mazmundaǵy qoldanystaǵy zań 2008 jylǵy shildeniń 5-inde qabyldanǵan bolatyn. Biraq, tájirıbede qoldaný barysynda qujatty odan ári jetildirý qajettiligi anyqtalǵan. Sebebi, zańnyń birqatar normalary tym qatań jáne memlekettiń fıskaldyq múddesi men kásipkerlerdiń zańdy múddeleriniń ekonomıkalyq teńgerimdiligin tolyq qamtamasyz ete almaıdy. Ekinshiden, zańda halyqaralyq iskerlik operatsııalardyń erekshelikteri tolyq eskerilmegen ári jekelegen normalar arasynda qarama-qaıshylyqtar oryn alǵan. Osyǵan oraı, zań jobasyn ázirleýshiler qarjy daǵdarysy men álemdik ekonomıkadaǵy turaqsyzdyq jaǵdaıynda joǵaryda kórsetilgen kemshilikterdiń iskerlik belsendiliktiń damýyn tejep, ınvestıtsııa tartýǵa kedergi jasap otyrǵanyn alǵa tartady. Bul rette, zań jobasyndaǵy qamtylǵan ózgerister eń aldymen kemshilikterdi joıýǵa negizdeledi. Budan bólek, zań normalary qazirgi zamanǵy halyqaralyq saýda normalaryna beıimdele túsedi.
Senat depýtattary zań jobasyna naqtylaý sıpatyndaǵy ózgeristerdi engizgen bolatyn.
