Májilis tótenshe jaǵdaı kezinde memlekettik basqarýdyń jumys mehanızmin belgileıtin zań jobasyn maquldady
NUR-SULTAN. QazAqparat - Búgin QR Parlamenti Májilisiniń jalpy otyrysynda tótenshe jaǵdaı kezeńinde memlekettik basqarýdyń jumys isteý mehanızmin belgileıtin zań jobasy maquldandy, dep habarlaıdy QazAqparat tilshisi.
Qujat «Áleýmettik-ekonomıkalyq turaqtylyqty qamtamasyz etý jónindegi sharalar týraly» 2020 jylǵy 16 naýryzdaǵy Memleket basshysynyń Jarlyǵyn oryndaý maqsatynda ázirlendi. Zań jobasynyń maqsaty áleýmettik-ekonomıkalyq turaqtylyqty qamtamasyz etý úshin tótenshe jaǵdaı kezeńinde jedel sharalar qabyldaý múmkindigi bolyp sanalady.
Zań jobasy boıynsha qosymsha baıandama jasaǵan Ekonomıkalyq reforma jáne óńirlik damý komıtetiniń tóraǵasy Nurtaı Sabılıanovtyń aıtýynsha, qaralyp otyrǵan qujat tótenshe jaǵdaı kezeńinde azamattardyń qaýipsizdigin, QR-nyń Konstıtýtsııalyq qurylysyn qorǵaýdy qamtamasyz etý úshin jedel sharalar qabyldaý maqsatynda ázirlendi.
«Zań jobasymen QR tótenshe jaǵdaılar týraly jáne quqyqtyq aktiler týraly Zańdaryna ózgerister engizý kózdeledi. Atalǵan Zańdar áleýmettik-ekonomıkalyq salada tótenshe jaǵdaı engizý kezinde qoldanylatyn negizgi sharalar men ýaqytsha shekteýler boıynsha normalarmen tolyqtyrylyp otyr. Osyǵan oraı QR Prezıdentiniń normatıvtik-quqyqtyq aktileri negizinde áleýmettik-ekonomıkalyq salalarda belgili bir merzimge zańnamanyń qoldanylý erekshelikteri belgilenýi múmkin. Olar eldegi áleýmettik-ekonomıkalyq turaqtylyqty saqtaýǵa jáne tótenshe jaǵdaılardyń teris saldarynyń aldyn alýǵa múmkindik beredi», - dedi Májilis depýtaty.
Qujat tótenshe jaǵdaı kezeńinde zańnamanyń jekelegen salalarynyń qoldanylý erekshelikterimen tolyqtyrylady.
Zań jobasynda olarǵa 14 sala jatqyzylady: salyqtyq, bıýdjettik, keden, banktik, eńbek, monopolııaǵa qarsy zańnama; densaýlyq, memlekettik satyp alý, valıýtalyq retteý týraly zańnama; áleýmettik qorǵaý, memlekettik múlik, memlekettik baqylaý jáne qadaǵalaý salasynda; sondaı-aq eldiń halyqaralyq mindettemelerin iske asyrý.
Zań jobasyn Májilis depýtattary tolyqtaı qoldady. Qujat Senatqa joldanady.
