Májilis tótenshe jaǵdaı kezinde memlekettik basqarýdyń jumys isteý mehanızmin talqylaýda
NUR-SULTAN. QazAqparat - QR Parlamenti Májilisiniń depýtattary «Qazaqstan Respýblıkasynyń keıbir zańnamalyq aktilerine tótenshe jaǵdaı máseleleri boıynsha ózgerister engizý týraly» zań jobasyn talqylaýda, dep habarlaıdy QazAqparat tilshisi.
Zań jobasy boıynsha baıandama jasaǵan QR Ulttyq ekonomıka mınıstri Rýslan Dálenovtiń aıtýynsha, qujat «Áleýmettik-ekonomıkalyq turaqtylyqty qamtamasyz etý jónindegi sharalar týraly» 2020 jylǵy 16 naýryzdaǵy Memleket basshysynyń Jarlyǵyn oryndaý maqsatynda ázirlendi. Zań jobasynyń maqsaty áleýmettik-ekonomıkalyq turaqtylyqty qamtamasyz etý úshin tótenshe jaǵdaı kezeńinde jedel sharalar qabyldaý múmkindigi bolyp sanalady.
«Zań jobasynda tótenshe jaǵdaı kezeńinde memlekettik basqarýdyń jumys isteý mehanızmi belgilenedi. Ol úshin «Tótenshe jaǵdaı týraly» jáne «Quqyqtyq aktiler týraly» zańdarǵa túzetýler engiziledi. Atap aıtqanda, qujat tótenshe jaǵdaı kezeńinde zańnamanyń jekelegen salalarynyń qoldanylý erekshelikterimen tolyqtyrylady. Zań jobasynda olarǵa 14 sala jatqyzylady: salyqtyq, bıýdjettik, keden, banktik, eńbek, monopolııaǵa qarsy zańnama; densaýlyq, memlekettik satyp alý, valıýtalyq retteý týraly zańnama; áleýmettik qorǵaý, memlekettik múlik, memlekettik baqylaý jáne qadaǵalaý salasynda; sondaı-aq eldiń halyqaralyq mindettemelerin iske asyrý», - dedi mınıstr.
Onyń atap ótýinshe, tótenshe jaǵdaı kezeńinde qabyldanǵan quqyqtyq aktiler jalpy alǵanda ol aıaqtalǵanǵa deıin qoldanylatyn bolady. Olardyń qataryna ózge qoldanylý merzimi belgilengen aktiler kirmeıdi.
«Tótenshe jaǵdaı týraly» Zańda belgilengen jaǵdaıda jáne tártippen normatıvtik quqyqtyq aktiniń nemese onyń jekelegen normalarynyń qoldanylýyn toqtata turý boıynsha «Quqyqtyq aktiler týraly» Zańǵa usynylyp otyrǵan túzetý engiziledi. Jalpy alǵanda, atalǵan túzetýler tótenshe jaǵdaı kezeńinde áleýmettik-ekonomıkalyq turaqtylyqty qamtamasyz etýge baǵyttalǵan. Zań jobasyn qabyldaý bıýdjetten qosymsha qarjylyq shyǵyndardy talap etpeıdi jáne teris áleýmettik-ekonomıkalyq jáne quqyqtyq saldarǵa ákep soqpaıdy», - dedi Rýslan Dálenov.
