Májilis tóraǵasy júrgizýshilerdiń medıtsınalyq tekserýden ótýin jeńildetýdi usyndy
NUR-SULTAN. QazAqparat - Parlament Májilisiniń tóraǵasy Nurlan Nyǵmatýlın júrgizýshiler úshin medıtsınalyq komıssııadan ótý rásimin ońtaılandyrýdy usyndy, dep habarlaıdy QazAqparat tilshisi.
Atap aıtqanda, Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujatty talqylaý barysynda N. Nyǵmatýlın júrgizýshi kýáligin alý úshin medıtsınalyq komıssııadan ótý tártibi jaıynda surady.
Óz kezeginde QR Densaýlyq saqtaý vıtse-mınıstri Oljas Ábishev komıssııadan ótý kezinde 8 dáriger-mamannyń tekserýi jáne 7 analızdi tapsyrý qamtylǵanyn jetkizdi.
«Bul rásimderdi eskersek, sizder júrgizýshini emes, ǵaryshkerdi iriktep jatqandaı kórinedi. Búginde múldem basqa jaǵdaılar jasalǵan ǵoı. Keıbir kórsetkishter boıynsha testileý ótkizý jetkilikti bolar, ıaǵnı kózdiń kórýi, estý qabileti sekildi negizgi mamandar. Bul jumystardy ońtaılandyryp, tıisti usynystar engizińizder», - dedi Májilis tóraǵasy.
Sonymen qatar, N. Nyǵmatýlın medıtsınalyq kýálandyrýdy uıymdastyrý sharalaryna da toqtaldy. Osy oraıda ol búginde adamdar analız tapsyrý úshin uzyn-sonar kezekte turatynyn jáne bul jerlerde tıisti jaǵdaı jasalmaǵanyn atap ótti.
Májilis spıkeriniń paıymynsha, bul máseleni egjeı-tegjeıli pysyqtaý kerek. Bul rette dárigerlik tekserý erejesin qaıta qarastyrý qajet bolyp tur, sebebi osy talaptar mamandandyrylǵan halyqqa qyzmet kórsetý ortalyqtary bolmaǵan kezde bekitilgen. Ol kezde avtomattandyrylǵan qyzmetterdiń, aqparattyq júıeler ıntegratsııasynyń tıisti deńgeıi bolmaǵan edi.
«Medıtsınalyq tekserý men júrgizýshi kýáligin alý úshin bazany qurǵan kezde osynyń barlyǵyn eskerý kerek. Adamdarǵa qolaıly jaǵdaı jasaý qajet. Qazirgi kezde bir kezekten ekinshisine barýǵa májbúr. «Azamattarǵa arnalǵan úkimet» memlekettik korporatsııasymen birlese medıtsınalyq tekserýden ótkizýdiń jańa erejesin ázirleńizder. Eń bastysy, usynylatyn qyzmetterdiń sapasyn jaqsartý kerek», - dedi N. Nyǵmatýlın.
