Májilis tóraǵasy jedel járdem kólikterine GPS ornatýdy usyndy
ASTANA. QazAqparat - QR Parlamenti Májilisiniń tóraǵasy Nurlan Nyǵmatýlın oblys ortalyqtarynda jedel járdem mashınalaryn GPS-monıtorlarymen jasaqtaýdy usyndy, dep habarlaıdy QazAqparat.
«Bizdiń barlyq oblys ortalyqtarynda osyny júzege asyrý kerek. Adamdar úshin jedel járdem brıgadasyn shaqyrǵannan keıin tıisti kómek tez ýaqytta jetýi mańyzdy. Sonymen birge azamattyń naqty dertine mamandandyrylǵan járdem bolýy kerek»,-dedi Nyǵmatýlın Májilistegi jalpy otyrys barysynda QR Densaýlyq saqtaý mınıstri Eljan Birtanovqa qaratyp aıtqan sózinde.
Otyrys barysynda palata depýtattary «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Áleýmettik medıtsınalyq saqtandyrý jobasy) ratıfıkatsııalaý týraly» zań jobasyn maquldaǵan bolatyn.
Depýtattar saýalyna jaýap bergen mınıstr jedel járdem qyzmetiniń jolda kóp keshigýiniń negizgi sebebi retinde mashınalar kóp jaǵdaıda shuǵyl medıtsınalyq kómek qajet emes shaqyrtýlarǵa baratyndyǵyn atady.
Joba aıasynda call-ortalyq qurylyp, ol óńirlik ortalyqtarmen ózara is-qımyl jasaıtyn bolady. Osy rette tıisti úılestirý sharalary eskeriledi. Nátıjesinde, shaqyrtýlardyń bir bóligi bazalyq emhanalar men óńirlerdiń statsıonarlaryna baǵyttalady. Bul óz kezeginde jedel járdemge júktemeni azaıtyp, shaqyrtýǵa baratyn dárigerlerdiń ýaqtyly jetýin qamtamasyz etedi dep kútilýde.
Zań jobasy boıynsha baıandamasynda E. Birtanov halyq densaýlyǵyn saqtaý salasyndaǵy basty maqsat - ol mindetti áleýmettik medıtsınalyq saqtandyrýdy engizý ekenin atap ótti. «Densaýlyq saqtaýǵa jumsalatyn memlekettik jáne jeke shyǵyndardyń ósýi halyq pen jumys berýshilerdiń yntymaqtastyq jaýapkershiligi ustanymy negizinde densaýlyq saqtaý salasynyń qarjylyq turaqtylyǵyn kúsheıtýdi qajet etedi. Qazaqstan men Halyqaralyq Qaıta Qurý jáne Damý Banki arasyndaǵy qaryz týraly kelisimge 2016 jyly 1 qarashada qol qoıyldy. Qaryz somasy 80 mln AQSh dollaryn quraıdy. Qazaqstan Respýblıkasynyń birlesip qarjylandyrý kólemi 10 mln dollar», - dedi mınıstr.
