Májilis tóraǵasy Ýkraınadaǵy jaǵdaıǵa qatysty pikir bildirdi
Májilistiń jalpy otyrysynan keıin tilshiler palata tóraǵasynan Ýkraınadaǵy jaǵdaıdy sheshýde Qazaqstan qandaı úlesin qosa alatynyn surady.
«Árıne, Ýkraına men Reseı bizdiń baýyrlas elder sanalady. Bizge osy shıelenis aýyr tıip otyr. Sondyqtan adamdardyń ómiri qıylyp jatqany, qalalardyń talqandalyp jatqany - qıyn jaǵdaı. Qazaqstan qalaı kómektese alady? Bul turǵyda keshe Memleket basshysy tıisti málimdeme jasady. Biz kelissóz júrgizýge qatysty kómek kórsete alamyz, ıaǵnı osyǵan tıisti alańdy usyna alamyz», - dedi E. Qoshanov.
Sonymen qatar Májilis tóraǵasyna Reseıge salynǵan sanktsııalardyń Qazaqstanǵa áseri týraly suraq qoıyldy.
«Osy máselege qatysty ahýal saǵat saıyn, kún saıyn ózgerip tur. Sondyqtan buǵan boljam aıtý qıyn. Memleket basshysy Ulttyq bankke jáne Úkimetke batys elderiniń (Reseıge) sanktsııalarynyń qazaqstandyq ekonomıkaǵa yqpalyn barynsha tómendetý týraly tapsyrma berdi. Bul turǵyda elimizde barlyq qajetti qadamdar jasalyp jatyr», - dedi Erlan Qoshanov.
