Májilis Tóraǵasy sýmen jabdyqtaý salasyndaǵy problemalardy atady
ASTANA. QazAqparat - Sýmen jabdyqtaý salasyna memlekettik-jekeshelik áriptestikti engizý sý resýrstaryn basqarý tıimdiligin arttyrýǵa múmkindik berer edi.
Bul týraly búgin QR Parlamenti Májilisiniń Tóraǵasy Nurlan Nyǵmatýlın aıtty, dep habarlaıdy QazAqparat.
Elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý barysynda Nurlan Nyǵmatýlın sýmen jabdyqtaý salasyn jaqsartý úshin jaqyn arada sheshimi tabylýy tıis negizgi máselelerdi atady.
«Birinshiden, búgingi kúni sýmen jabdyq nysanyn salý jáne paıdalanýǵa berý barysynda júıeli ádister joq. Qazirgi ýaqytta ókinishke oraı toptyq sý qubyry salynǵannan keıin aýylishilik jelilerdiń daıyn bolmaýynan eldi mekenge sý berýge múmkinshilik bolmaıtyn jaǵdaılardy kórip otyrmyz. Munyń barlyǵy bıýdjet qarajatyn tıimsiz paıdalanýǵa, sonymen birge eldi mekendi sapaly aýyz sýmen qamtamasyz etpeýge ákeledi. Oǵan eldi mekendi sýmen qamtamasyz etý ınfraqurylymyn salý jáne paıdalanýǵa berý boıynsha biryńǵaı operatordyń joqtyǵy sebep bolýda», - dedi ol.
Májilis Tóraǵasynyń aıtýynsha, ekinshiden, nysandardyń qurylysy aıaqtalǵannan keıin olardyń paıdalaný máselesi de ózekti bolyp otyr. Búginde sýmen jabdyqtaý júıesinde materıaldyq qural-jabdyqpen jáne kadrlyq áleýetpen qamtamasyz etilgen qyzmet kórsetýshi kásiporyndar aýdan ortalyqtarynda ǵana bar. Al aýyldar men eldi mekenderdegi sýmen jabdyqtaý júıesi aýyl ákimderiniń qyzmet kórsetýine berilgen. Al olar qajetti qural-jabdyqpen de, mamandarmen de qamtamasyz ete almaı otyr. Sonyń saldarynan sýmen jabdyqtaý júıelerinde apat jıi oryn alyp, jeliler men qural-jabdyqtardyń isten shyǵýy, sý berýdiń toqtatylýy kezdesip jatady.
«Úshinshiden, sýmen jadbyqtaý nysandaryn paıdalanýmen tek memlekettik kásiporyn ǵana aınalysýy tıis. Degenmen, Frantsııa, Ispanııa syndy elderdegi álemdik tájirıbede memlekettik kásiporyn kontsessııa formasynda nemese jaldaý sharty negizinde sýmen jabdyqtaýdy basqarýda jaýapty retinde jeke kompanııany taǵaıyndap jatady. Bizde de memlekettik-jekeshelik áriptestikti engizý sý resýrstaryn basqarý tıimdiligin arttyrýǵa múmkindik berer edi», - dedi Nurlan Nyǵmatýlın.
