Májilis Tóraǵasy Sankt-Peterbordaǵy halyqaralyq forýmǵa qatysýda

ASTANA. QazAqparat - Májilis Tóraǵasy Baqtyqoja Іzmuhambetov «Eýrazııalyq ekonomıkalyq perspektıva» IV halyqaralyq forýmynda sóılegen sózinde kelisilgen agrarlyq saıasatty odan ári jalǵastyrý jáne onyń EAEO ınfraqurylymy men kóliktik-logıstıkalyq damýǵa baılanysty túıindesý múmkindikterin meńgerýdi usyndy.

Májilis depýtattary qatysyp jatqan bul mańyzdy forým búgin Sankt-Peterborda TMD Parlamentaralyq Assambleıasynyń kóktemgi sessııasy aıasynda ótip jatyr.

Forýmda EAEO Azııanyń ońtústik-shyǵys elderimen yntymaqtastyq perspektıvasy, erkin saýda aımaǵyn qurý máseleleri áńgime ózegine aınaldy.

B. Іzmuhambetov BUU boljamy boıynsha 2050 jylǵa qaraı álem turǵyndarynyń sany 10 mlrd-tan asatyndyǵyn, soǵan sáıkes, azyq-túlik ónimine degen suranys 70 paıyzǵa artatyndyǵyn eske saldy. Qazirgi ýaqytta dúnıejúzinde ekologııalyq taza ónimge degen suranys jyl saıyn 20-30 paıyzǵa artqany baıqalady.

- Turaqty damýdyń ǵalamdyq kún tártibinde azyq-túlik qaýipsizdigin qamtamasyz etý asa ózekti bolmaq. Bizde osy olqylyqtyń ornyn toltyrý úshin tabıǵı resýrstar da, adam kapıtaly da bar. Sonymen qatar, EAEO-tyń Eýropa, Qytaı, Azııa aralyǵynda ornalasýy bizdi qajetti basymdyqtarmen qamtamasyz etedi,-dedi Májilis Spıkeri.

Májilis Tóraǵasynyń aıtýynsha, búgingi kúni Qazaqstanda 100 mln-nan artyq jer aýyl sharýashylyǵy aınalymyna berilgen. Sońǵy 10 jylda aýylsharýashylyǵynda óndirý kólemi 41 paıyzǵa, eksport kólemi 59 paıyzǵa artqan. Osy salanyń negizgi kapıtalyna quıylǵan ınvestıtsııa kólemi 2005 jyly 149 mln. dollardan 2015 jyly 507 mln. dollarǵa, 3 esege deıin ulǵaıdy.

Óz sózinde B. Іzmuhambetov otandyq aýyl sharýashylyǵy ónimderin óndirýshilerdi qoldaý úshin zańnamalyq baza qurý qajettiligin atap ótti. Ótken jyly «Aýyl sharýashylyǵy kooperatıvteri týraly» jáne «Organıkalyq ónimder óndirý týraly» zańdar qabyldanǵan bolatyn.

Májilis Tóraǵasy atalǵan salany damytýǵa jáne jańa tehnologııalar engizýge Astanada ornalasatyn azyq-túlik qaýipsizdigi jónindegi Islam uıymy da yqpal etetindigin jetkizdi, dep habarlaıdy Májilistiń baspasóz qyzmeti.