Májilis tóraǵasy salyq salý salasyndaǵy kemshilikterdi atady
NUR-SULTAN. QazAqparat - Parlament Májilisiniń tóraǵasy Nurlan Nyǵmatýlın salyqtardy esepteý salasyndaǵy kemshilikterdi atady, dep habarlaıdy QazAqparat tilshisi.
«Salyqtyq raqymshylyq salyq tóleýshilerden bólek, Memlekettik kirister komıteti qyzmetkerlerine de qajet degen pikir qalyptasyp otyr. Sońǵy kezderi jeke tulǵalarda salyq boıynsha qomaqty somada qaryzdary baıqalǵan. Árıne, bul birinshi kezekte salyq tóleýshilerdiń kinási. Alaıda kóbinese bul jaǵdaı sapasyz salyqtyq ákimshileý, júıesizdik, sondaı-aq keıde óziniń jumysyna salyq organdarynyń salǵyrt qaraýynan oryn alady», - dep toqtaldy Májilis tóraǵasy palatanyń jalpy otyrysynda.
Memlekettik kirister komıteti aqparatyna qaraǵanda, el boıynsha jeke tulǵalarǵa korporatıvtik tabys salyǵy, qosylǵan qun salyǵy boıynsha 700 mln teńge somaǵa salyqtyq qaryz eseptelingen. Negizinen, bul salyqtardy zańdy tulǵalar tóleıdi.
«Bul salyqtyq boryshtyń somasy osy jeke tulǵalarǵa 15 jyldan beri eseptelgen. Oǵan jyl saıyn ósimpul qosylady. Atap aıtqanda, osy jeke tulǵalar jeke kásipker retinde tirkelmegeni de anyqtaldy», - dedi N. Nyǵmatýlın.
Bul turǵyda talqylaý barysynda málimetter bazasy ózektiligi men aqparattyq júıeler ıntegratsııasyndaǵy problemalar atap ótildi.
«Salyqty esepteýdegi qatelikterge qatysty azamattardyń shaǵymdary tıisti jumystardy qysqa merzimde aıaqtaý kerektigin baıqatyp otyr. Eń bastysy, salyqpen tikeleı qatysty mınıstrlikterdiń derekter bazasynyń ıntegratsııasyn aıaqtaý qajet», - dedi Májilis tóraǵasy.
