Májilis tóraǵasy referendýmda daýys berdi

NUR-SULTAN. QazAqparat – QR Parlamenti Májilisiniń tóraǵasy Erlan Qoshanov elordadaǵy N110 referendým ýchaskesinde daýys berdi, dep habarlaıdy QazAqparat tilshisi.

Palata spıkeri Erlan Qoshanov ta elorda turǵyndarymen birge Konstıtýtsııalyq reformaǵa baılanysty ótip jatqan respýblıkalyq referendýmda óz tańdaýyn jasady.

N110 referendým ýchaskesi komıssııasynyń tóraǵasy Zamır Serikovtiń aıtýynsha, munda 2818 adam daýys berýshi retinde tirkelgen.

«Bizdiń ýchaskege tańǵy saǵat 7.00-de on shaqty adam kelip daýys berýdi bastady. Qazirgi qarqynǵa qaraǵanda saǵatyna 50-100 adamnan kelip jatyr. Alǵash bolyp daýys bergen úsh adamǵa syılyq tabystadyq. Jergilikti, halyqaralyq baıqaýshylar da tańǵy saǵat 7.00-den bastap jumystaryna kiristi», —dedi Z.Serikov.

Aıta keteıik, osydan týra bir aı buryn QR Prezıdenti Qasym-Jomart Toqaev 5 maýsymda respýblıkalyq referendým ótkizý týraly Jarlyqqa qol qoıǵan edi.

Referendýmǵa baratyn qazaqstandyqtar myna dúnıelerdi bilýi kerek.

Keshe referendým aldyndaǵy «tynyshtyq» kúni boldy.