Májilis Tóraǵasy O. Muhamedjanov palatanyń tórtinshi sessııasyn qorytyndylady
ASTANA. 29 maýsym. QazAqparat /Qanat Mámetqazyuly/ - Búgin QR Parlamenti Májilisi óziniń tórtinshi sessııasyndaǵy sońǵy otyrysyn ótkizdi. Osyǵan oraı, otyrys sońynda palata Tóraǵasy Oral Muhamedjanov ótken sessııany qorytyndylap, sóz sóıledi.
«Ótken kezeń el ómirinde mańyzdy oqıǵalarǵa toly boldy. Kóp eldermen salystyrǵanda, Qazaqstan ekonomıkalyq daǵdarystan shyǵynsyz ótip, turaqty damý jolyna tústi. Ótken jyly jalpy ishki ónimniń naqty ósimi 7 paıyzdy qurady. Elbasy bastamashylyq jasaǵan «Jol kartasy» halyqty jumyspen qamtý problemasyn aıtarlyqtaı sheshýge múmkindik berdi. Ár oblysta júzdegen bilim berý, densaýlyq saqtaý, turǵyn úı-kommýnaldyq sharýashylyq nysandary, myńdaǵan shaqyrym joldar jóndeýden ótip, kóptegen jańa jumys oryndary ashyldy» - dedi O. Muhamedjanov óz sózinde.
Sonymen qatar, palata Tóraǵasy elimizdiń aldynda turǵan óreli mindetterge de toqtaldy. Atap aıtqanda, Qazaqstan 2016 jylǵa qaraı jan basyna shaqqandaǵy JІÓ-di 15 myń dollarǵa jetkizip, tabys deńgeıi joǵary elder qataryna kirý mindetin qoıyp otyr. Sondaı-aq 2015 jylǵa deıin jalpy somasy shamamen 80 mlrd. dollardy quraıtyn 500-ge jýyq joba júzege asyp, 200 myń jańa jumys ornyn qurý josparlanýda.
«Osy oraıda atap ótetin másele, ótken jyldyń ózinde jalpy quny 800 mlrd. teńgeden asatyn 152 jańa nysan iske qosyldy», - dedi O. Muhamedjanov.
