Májilis Tóraǵasy O. Muhamedjanov «Eýrazııa dıalogy» halyqaralyq qoǵamdyq qorynyń prezıdentin qabyldady
áýirdiń 23-i. QazAqparat /Qanat Mámetqazyuly/ - Búgin QR Parlamenti Májilisiniń Tóraǵasy Oral Muhamedjanov «Eýrazııa dıalogy» halyqaralyq qoǵamdyq qorynyń prezıdenti Salıh Aqshaı myrzany onyń ótinishi boıynsha qabyldady,
dep habarlaıdy QazAqparat.
Qazaqstan Respýblıkasynyń Prezıdenti Nursultan Nazarbaevtyń Eýrazııalyq ıdeıasy kezdesýdiń basty taqyrybyna aınaldy. Óz sózinde Májilis Tóraǵasy HHІ ǵasyrda órkenıetke bastaǵan elderdiń arasyndaǵy mádenı baılanystardy damytý jaıynda áńgime qozǵap, Birikken Ulttar Uıymy jáne álemdik qaýymdastyqtyń qoldaýyna ıe bolǵan Qazaqstannyń tájirıbesi men Memleket basshysynyń bastamalaryna toqtalyp ótti. Sonymen birge, áńgime barysynda ıadrolyq qarýdan birinshi bolyp bas tartqan el retinde Qazaqstannyń bedeliniń artyp otyrǵanyna nazar aýdaryla otyryp, álemdik damý kezindegi halyqtardyń rýhanı baılyq arqyly jaqyndasýy týraly máselelerdi talqylady.
Óz kezeginde meıman «Eýrazııa dıalogy» tuǵyrnamasynyń búgingi atqaryp otyrǵan qyzmeti týraly baıandap berdi. Aıta ketý kerek, 1998 jyly Ystambul qalasynda ótken Eýrazııa jazýshylary men jýrnalısteri qaýymdastyǵynyń alǵashqy kezdesýinde erkin, tabys tabýdy kózdemeıtin, memleketterdiń saıası is-áreketine aralaspaıtyn halyqaralyq «Eýrazııa dıalogy» tuǵyrnamasyn qurý týraly oı týyndaǵan bolatyn. Atalǵan uıym osylaı dúnıege kelgen.
Kezdesý sońynda Májilis Tóraǵasy meımannyń izgilik jolyndaǵy qyzmetine tabys tiledi.
