Májilis Tóraǵasy qazaqstandyqtardy Astana kúni merekesimen quttyqtady

«Astana bizdiń bárimizdiń de súıikti elordamyz. Astana men Qazaqstannyń táýelsizdigi ajyramas egiz uǵym. Bizdiń táýelsizdigimizdiń sımvoly», - dedi ol búgin Parlamenttiń tórtinshi shaqyrylymynyń tórtinshi sessııasy aıaqtalǵannan keıin BAQ ókilderine bergen suhbatynda.

Qazirgi ýaqytta Astana qalasynyń jaı-kúıi alǵash elorda Aqmolaǵa kóshken 1997 jylmen salystyrǵanda kún saıyn, saǵat saıyn gúldenip, kórkeıip kele jatqandyǵyn basa aıtqan O.Muhamedjanov: «Sondyqtan men astanalyqtardy ǵana emes qazaqstandyqtardy da osy merekemen quttyqtaımyn!», - dedi.

Sondaı-aq ol kanıkýl kezinde 2 aptaǵa nemerelerin alyp, Egeı, Bodrým teńizderine baryp demalatyndyǵyn atap ótti.

Al jýrnalıster tarapynan áriptesi I.Elekeevtiń ekonomıkalyq qıyn jaǵdaıda otyrǵan qyrǵyz eline kómek retinde Ystyqkólge baryp demalýǵa qatysty usynysyna baılanysty qoıylǵan saýalǵa «Grekııaǵa baryp demalýdy usynýǵa da bolady. Qazirgi ýaqytta Grekııa da qatty zardap shegýde. Sonymen qatar qıyn jaǵdaıda qalyp otyrǵan basqa da elderge barýǵa bolady. Al eń jaqsysy, ózimizdiń Alataý, Býrabaı, Oqjetpes syndy kýrorttarǵa barǵan durys», - dep jaýap berdi Májilis Tóraǵasy.