Májilis Tóraǵasy «Hatyn» memorıaldyq kesheninde bolyp, soǵys qurbandaryna taǵzym etti
ASTANA. 25 qazan. QazAqparat - Búgin, 25 qazan kúni Belarýs Respýblıkasynda resmı saparmen júrgen QR Parlamenti Májilisiniń Tóraǵasy Oral Muhamedjanov «Hatyn» memorıaldyq kesheninde bolyp, Uly Otan soǵysynyń qurbandaryna taǵzym etti. Estelik kitabyna qoltańba qaldyrdy,
dep habarlaıdy Májilistiń baspasóz qyzmeti.
«Hatyn» memorıaldyq kesheni Uly Otan soǵysy kezinde qaza tapqan 3 mıllıondaı belarýstyń rýhyna taǵzym jasaý úshin ornatylǵan eskertkish. Ol Mınsk qalasynan soltústik-shyǵysqa qaraı 54 shaqyrym jerde.
1943 jyldyń qasiretti kúnine deıin Hatyn 26 úıden turatyn, beıbit ómir súrip jatqan belarýsterdiń shaǵyn derevnıasy boldy. 22 naýryz kúni tańerteń partızandar derevnıadan 6 shaqyrymdaı jerde ótip bara jatqan nemistiń avtokolonnasyna oq atady. Atys barysynda nemis ofıtseri óledi. Sodan keıin jazalaýshy otrıad Hatyn aýlyn qorshaýǵa alady. Olar qarııalardy, áıelder men balalardy aıdap ákelip, qambaǵa qamap, syrtynan ot qoıady. Osy órtte 149 adam opat boldy, sonyń ishinde 75-i bala bolatyn.
Otqa oranǵan qambanyń ishinen bir-aq adam tiri shyqqan. Ol 56 jastaǵy Iosıf Kamınskıı edi. Ol óziniń jaraly balasyn da alyp shyǵýǵa kúsh salady, biraq balasynyń ómirin saqtap qala almady.
Hatyn tarıhy jalǵyz oqıǵa emes. Uly Otan soǵysy kezinde belarýsterdiń 628 derevnıasy turǵyndarymen birge tirileı órtelgen! Onyń 186-sy qaıtadan qalypqa keltirilgen joq, jermen jeksen boldy.
