Májilis Tóraǵasy Grýzııanyń vıtse-premerimen kezdesti

ASTANA. QazAqparat - Búgin Parlament Májilisiniń tóraǵasy Nurlan Nyǵmatýlın Grýzııanyń vıtse-premeri, Syrtqy Іster mınıstri Mıheıl Djanelıdzemen kezdesti. Bul týraly QazAqparat Májilistiń baspasóz qyzmetine silteme jasap habarlaıdy.

Taraptar ekijaqty qarym-qatynasty nyǵaıtýdyń, sonyń ishinde saýda-ekonomkalyq, mádenı-gýmanıtarlyq, halyqaralyq baılanysty damytýdyń ózekti suraqtaryn talqylady.

Halyqaralyq yntymaqtastyq tóńireginde Qazaqstan Prezıdenti Nursultan Nazarbaevtyń halyqaralyq jaǵdaılardy retteýde elder arasyndaǵy ózara senim men syndarly únqatysýǵa aıryqsha nazar aýdaratynyn alǵa tarta kelip, Májilis Spıkeri bizdiń memleketterimizdiń osy saladaǵy ustanymdarynyń óte jaqyn ekenin eske saldy.

Osy rette Májilis Tóraǵasy Qazaqstan Prezıdentiniń BUU aıasynda halyqaralyq lańkestik pen ekstremızmge qarsy is-qımyldyń biryńǵaı álemdik júıesin qurý týraly bastamasynyń mańyzdylyǵyna toqtaldy.

N. Nyǵmatýlın atap ótkendeı, Qazaqstan Grýzııamen jan-jaqty áriptestikti nyǵaıtýǵa erekshe mán beredi.

Ótken jyly eki el arasynda dıplomatııalyq qatynastyń ornaǵanyna 25 jyl toldy. Osy ýaqyttarda ózara syılastyq pen senim negizinde aradaǵy yqpaldastyq tereńdeı tústi.

Óz kezeginde mártebeli meıman Qazaqstannyń ishki jáne syrtqy saıasatyndaǵy turaqtylyq pen tańdanaralyq qarqyndy damýy tek aımaqtaǵy elder emes, álem elderine úlgi ekenin jetkizdi.

Júzdesý barysynda parlamentaralyq yqpaldastyqty  nyǵaıtýǵa da zor kóńil bólindi.

Májilis Tóraǵasy osy oraıda yntymaqtastyq jónindegi toptar jumysyn kúsheıtýge nazar aýdardy.

Aıta keteıik, bıylǵy jyly, qazan aıynda Grýzııada mańyzdy saıası naýqan -Prezıdent saılaýy ótedi.