Májilis Tóraǵasy Grýzııa elshisin qabyldady

Májilis Tóraǵasy Nurlan Nyǵmatýlın Qazaqstandaǵy Grýzııanyń Tótenshe jáne Ókiletti elshisi Zýrab Abashıdzeni qabyldady, dep habarlaıdy QR Parlamenti Májilisi Apparatynyń baspasóz qyzmeti.

Taraptar barlyq sala boıynsha ekijaqty qarym-qatynasty odan ári tereńdetýdiń ózekti máselelerin talqylady.   

Bıyl eki memleket arasynda dıplomatııalyq qarym-qatynastyń ornaǵanyna 25 jyl toldy. Sondaı-aq 26-mamyr Grýzııa eliniń táýelsizdikti qalpyna keltirý - ulttyq meıramy. Májilis Tóraǵasy meımandy qos merekemen quttyqtady.

N. Nyǵmatýlın atap ótkendeı, Grýzııa Qazaqstannyń mańyzdy syrtqy saıası jáne ekonomıkalyq áriptesi. Ótken jyly qos memleket arasyndaǵy syrtqy saýda aınalymy 41 mln AQSh dollaryn qurady. Májilis Tóraǵasy atalǵan memlekettiń Mańǵystaý oblysymen Adjarııa arasynda tikeleı ekonomıkalyq baılanystar ornatý týraly bastamasyn qoldaıtyndyǵyn bildirdi.

Kezdesý barysynda aımaqtyq qaýipsizdik, mádenı-gýmanıtarlyq, halyqaralyq baılanystar máseleleri de nazardan tys qalmady.

Óz kezeginde Májilis Tóraǵasy elshini Qazaqstan Prezıdentiniń bastamasymen elde júrgizilgen konstıtýtsııalyq reforma tóńireginde habardar etti.

Parlamentaralyq yntymaqtastyqqa da aıryqsha kóńil bólgen Májilis Tóraǵasy yqpaldastyq jónindegi parlamenttik toptar men beıindi komıtetter múmkindigin paıdalaný kerektigine toqtaldy.

Taraptardyń pikirinshe, ol ekijaqty baılanystardy nyǵaıtýǵa zor yqpal etedi.