Májilis tóraǵasy Esep komıtetine sotqa materıaldardy sapaly daıarlaýǵa keńes berdi
Atap aıtqanda, Májilistiń jalpy otyrysynda QR Úkimetiniń jáne Respýblıkalyq bıýdjettiń atqarylýy jónindegi esep komıtetiniń 2016 jylǵy respýblıkalyq bıýdjettiń atqarylýy týraly esepteri tyńdaldy.
«Ótken jyly sizderdiń materıaldaryńyz boıynsha birde-bir aıyptaý úkimi shyǵarylǵan joq. Sizder zańnamalyq turǵyda tikeleı talap-aryzben sotqa júgine alatyn eldegi jalǵyz ókiletti organsyzdar. Sonymen qatar tapsyratyn materıaldaryńyz sotqa deıin jetpeı jatady.
Kóp jaǵdaılarda sizderdiń tekserýlerińiz nátıjesindegi usynylǵan materıaldardyń tómen sapasy sebebinen sotqa jetpeıtini baıqalýda. Bul turǵyda tekseris protsesi emes, onyń nátıjesi mańyzdy, ıaǵnı keltirilgen shyǵyn kólemin óteý, zań buzýshylyq úshin jaýapkershilikke tartylǵandardyń sany eskerilýi tıis. Tek sonda ǵana jumystyń tıimdiligi bolady. Biz bıýdjettik baǵdarlamalar ákimshileriniń, memlekettik organdardyń jaýapkershiligi týraly jıi aıtamyz. Alaıda sońǵy kezde tekserýshilerge de qatysty suraqtar týyndaýda. Tek barlyq taraptardyń ózara jaýapkershiligi kezinde ǵana memlekettik qarjyny paıdalanýda tıisti tártipti jasaı alamyz»,-dedi N. Nyǵmatýlın Esep komıtetiniń tóraǵasy Nurmuhambet Ábdibekovke qaratyp aıtqan sózinde.
Sóz sońynda Májilis tóraǵasy atqarylatyn jumystardyń tıimdiligin arttyrý baǵytynda Esep komıtetiniń zańnamalyq bastamalaryn depýtattar qoldaýǵa daıyn ekenin jetkizdi.
Óz kezeginde N. Ábdibekov Komıtet jumysyna qatysty aıtylǵan syn óte oryndy ekenin, kemshilikterdi túzetý jumystaryn iske asyratynyn atap ótti.