Májilis tóraǵasy energetıka salasy týraly zań jobasyn jan-jaqty jetildirý týraly usynys jasady
ASTANA. 28 naýryz. QazAqparat - Búgin Palatanyń jalpy otyrysynda qyzý talqyǵa túsken elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti máseleleri boıynsha tolyqtyrýlar men ózgerister engizýdi kózdeıtin zań jobasy týraly QR Parlamenti Májilisiniń Tóraǵasy Nurlan Nyǵmatýlın óz pikirin bildirdi.
Ol zań jobasynyń mańyzdylyǵyn atap ótti.
«Elektr qýatynyń 25 paıyzdan astamy magıstraldyq, ishki oramdyq júıelerde shyǵynǵa ushyraıdy. Eger biz tutynýshylar úshin jınaqtalatyn tarıftik baǵalar týraly aıtsaq, mine, sol jerlerde úlken únemdeý jasalýy kerek. Biraq osy salany túgeldeı jańǵyrtpasaq, 1940 jyldardan bizge jetken elektr jylý ortalyqtaryn kúrdeli jóndeýden ótkizbesek, erteńgi kúni biz energetıkalyq apatqa ushyraýymyz yqtımal. Sondyqtan bul salany damytý jónindegi belsendilikti qoldaý qajet. Biz osy salanyń barlyq tetikterin anyqtamaı jáne zańdyq turǵyda rettemeı turyp, bul zań jobany ekinshi oqylymǵa shyǵarmaımyz. Biz endi uzaqqa sozbaı, ekonomıkanyń osy bir mańyzdy salasyn Prezıdenttiń tapsyrmasy boıynsha naryq talaptaryna sáıkes keltirýimiz kerek. Basqasha bolýy múmkin emes», - dedi Májilis Tóraǵasy N. Nyǵmatýlın.
Osy oraıda Palata tóraǵasy jumys toby men salalyq komıtetke zań jobasyn ekinshi oqylymǵa daıyndaý barysynda birge jumys isteý úshin kásipkerler qaýymdastyǵyn, osy naryqta jumys isteıtin barlyq ujymnyń ókilderin shaqyrýdy usyndy. Zań jobasy birinshi oqylymda maquldandy.
