Májilis tóraǵasy dúkendegi baǵanyń statıstıkalyq derekke sáıkes kelmeıtinin aıtty
Májilisiniń tóraǵasy QR Ulttyq ekonomıka mınıstri Tımýr Súleımenovti halyqtyń statıstıkalyq derekterge senim arttyrý máselesine nazar aýdarýǵa shaqyrdy.
Aıta keteıik, búgin Májilistiń jalpy otyrysy barysynda depýtattar atalǵan mınıstrlik basshysynan sýpermarketter men bazarlardaǵy baǵanyń statıstıkanyń resmı málimetterimen salystyrǵanda nelikten aıyrmashylyǵy bolatynyn surady.
Osy oraıda, Nurlan Nyǵmatýlın bul turǵyda negizgi másele resmı statıstıkanyń derekter boıynsha halyqtyń senimine qatysty ekenin atap ótti.
«Árıne, sizder ortasha eseppen esepteısizder, bul esepteýler kúrdeli ádisnamaǵa negizdelgen, alaıda qoıylǵan saýaldyń máni basqada. Máselen, el turǵyny tutynýshylyq baǵa deńgeıi týraly sizderdiń resmı statıstıkalyq málimetterińizdi estıdi. Osydan keıin ol dúkenge kelip, ondaǵy taýarlardyń baǵasy múldem basqa deńgeıde ekenin kóredi. Statıstıkalyq derektermen salystyrǵanda, dúkendegi ónim quny qymbattaý bolady», - dep toqtaldy Májilis tóraǵasy.
Onyń paıymynsha, bul baǵytta halyq tarapynan resmı málimetterge senimsizdik oryn alyp otyr.
«Adamdar sizderdiń ortasha eseppen alynǵan kórsetkishterińizdi dúken sórelerindegi baǵamen salystyrǵan kezde, olardyń arasyndaǵy aıtarlyqtaı aıyrmashylyqty kóredi. Osydan memlekettik statıstıka derekterine qatysty tıisti senimsizdik týyndaıdy. Sizderdiń mamandaryńyzǵa mundaı teńgerimsizdikti boldyrmaýdyń qadamdaryn pysyqtaý qajet. Eger de baǵanyń ósýi boıynsha álemdik úrdisi men ınflıatsııalyq máseleler baıqalsa, ol jaıynda aıtý kerek. Sol kezde halyqtyń resmı statıstıkaǵa senimsizdigi bolmaıdy. Siz ózińiz de dúkenge barasyz ǵoı, sáıkesinshe, ondaǵy baǵalardy da bilesiz», - dedi N. Nyǵmatýlın Ulttyq ekonomıka mınıstri T. Súleımenovke qarata aıtqan sózinde.
