Májilis tóraǵasy dopıng problemasyna qatysty pikir bildirdi

ASTANA. QazAqparat - QR Parlament Májilisiniń tóraǵasy Nurlan Nyǵmatýlın elimizde dopıngke qarsy qatań sharalar qajet ekenin málim etti, dep habarlaıdy QazAqparat tilshisi.

«Dopıng problemasy búginde halyqaralyq sıpatqa ıe bolyp otyr. Kún saıyn onyń aýqymy artyp keledi. Ókinishke qaraı, sońǵy kezderi bul problema Qazaqstan sporty úshin de ózekti bolyp otyr. Bul turǵyda qatań sharalar qajet», - dedi N. Nyǵmatýlın Parlament Májilisiniń jalpy otyrysynda.

Májilis tóraǵasynyń paıymynsha, búgingi sporttaǵy eń úlken daý dopıngpen baılanysty.

«Ásirese, jastarǵa eleýli zııan keltiredi. Bizde álem chempıonatyn nemese Olımpıadany jeńip kelgen adamǵa medalder, ataq, kólik pen páterler, syıaqylar berile bastaıdy. Keıinnen dopıngke qatysty shıki tustary anyqtalady. Osy máselede sportshy ǵana emes, sonymen qatar olardy daıyndaıtyn mamandardyń da jaýapkershiligi bolýy kerek. Jas sportshy dopıngpen ustalsa, onyń janynda eshkim tabylmaıdy, sportshy jalǵyz qalady», - dedi Nurlan Nyǵmatýlın.

Osy oraıda N. Nyǵmatýlın dopıng jaǵdaıy eldiń ımıdjine keri áserin tıgizetinin atap ótti.

Budan buryn habarlanǵandaı, jalpy otyrysta QR Mádenıet jáne sport mınıstri Arystanbek Muhamedıuly Parlament Májilisiniń qaraýyndaǵy zań jobasy aıasynda dopıng paıdalanǵan sportshylardy qandaı jaza kútip turǵanyn aıtty.