Májilis tóraǵasy Danııar Aqyshevtyń jumysyn synǵa aldy
ASTANA. QazAqparat - Májilis tóraǵasy Nurlan Nyǵmatýlın Ulttyq bank tóraǵasy Danııar Aqyshevtyń jumysyn synǵa aldy, dep habarlaıdy «QazAqparat» HAA tilshisi.
Májiliste «Valıýtalyq retteý jáne valıýtalyq baqylaý týraly» zań jobasyn talqylaý barysynda Aqyshevqa depýtat Gennadıı Shıpovskıh suraq qoıǵan bolatyn.
«Esińizde bolsa, saqtandyrý týraly zań jobasyn qaraǵanda sizge saqtandyrý polısine qatysty suraq qoıǵanmyn. Siz sol aktýaldy esepter qajet, jazbasha túrde jaýap beremin degensiz. Al búgingi zań jobasynda saqtandyrýshylar qosymsha shyǵyn shyǵaratynyn kórip otyrmyn. Bul bizdiń halyq úshin de, bıznes úshin de, saqtandyrýshylarǵa da áser etip, baǵany qymbattatady. Endeshe zań daıyndaýdaǵy logıkańyzdy túsindirip berińizshi. Birinshi jaǵdaıda usynysymdy qaramadyńyz. Ekinshiden, búgin osy saqtandyrý normalaryn esep-qısapsyz engizip otyrsyz», - dedi depýtat.
Alaıda májilismen suraǵyna «Sizdiń suraǵyńyz bul zańnyń tujyrymdamasyna sáıkespeıdi" dep jaýap bergen Aqyshevtyń sózin Nurlan Nyǵmatýlın bóldi.
«Danııar Talǵatuly! Májilis otyrysynyń tóraǵasy bar. Bizdiń reglament boıynsha «ol suraqqa jata ma, jatpaı ma?» osyny Májilis tóraǵasy baqylaýǵa alady. Oǵan baǵa bermeı-aq qoıyńyz. Tikeleı suraqqa tikeleı jaýap berińiz!», - dedi ol.
Danııar Aqyshev óz jaýabynda máseleniń búgingi valıýtalyq retteý týraly zańǵa qatysy joq ekenin, onda saqtandyrý uıymdary týraly normanyń da joqtyǵyn aıtty. Depýtattyń tarıf týraly suraǵyna jaýap bere otyryp, saqtandyrý polısin uzartý týraly usynysty qaraýǵa ázir ekenin bildirdi.
«Bul usynys qyzmet tutynýshylar úshin saqtandyrý polısiniń qymbattaýyna ákeledi. Bul sózsiz. Sondyqtan, biz shuǵyl sheshim qabyldaı almaımyz. Buny qoǵam da qoldaı qoımaıdy», - dedi Aqyshev jaýabynda.
Alaıda Nurlan Nyǵmatýlın Aqshyevtiń sózin bólip, valıýtalyq baqylaý máseleleri boıynsha búgin qaralyp jatqan zań jobasynda saqtandyrý uıymdaryna talapty kúsheıtý qatysty normanyń baryn atap kórsetti.
«Ol (Shıpovskıh - avt.) avtokólik ıeleri týraly suraqty qoıyp otyrǵan joq. Ol sizde logıkanyń bar-joqtyǵy týraly aıtty. Sizge tıimdi kezde esep-qısapqa súıenip, jazbasha jaýapqa silteısiz. Qazir Ulttyq bank saqtandyrý uıymdaryna talapty kúsheıtý týraly normany usynyp otyrǵan kezde depýtat «engizý kerek pe?» dese, siz «joq» deısiz. Mine, ol sondyqtan sizge suraq qoıyp otyr. Siz búgin daıyn emessiz be? Bul ózgerister týraly resmı túrde málimdep otyrsyz ba? Álde, Ulttyq banktiń usynǵan ózgeristerin bilmeısiz be? Bálkim, Gennadıı Gennadıevıch, taǵy bir ret jazbasha túrde jaýap berýge múmkindik beremiz be?», - dedi Nurlan Nyǵmatýlın.
Óz kezeginde Gennadıı Shıpovskıh «Jazbasha jaýap bersin. Biraq jaýap naqty bolsyn!» degenine Aqyshev kóngen bolatyn. Alaıda bul jaýap Májilis tóraǵasyn qanaǵattandyrmady.
«Siz «naqty» degen sózdi túsinesiz be? Túsinbeseńiz, Gennadıı Gennadıevıchke baryńyz aýdaryp beredi», - dedi Nurlan Nyǵmatýlın.
