Májilis tóraǵasy Chehııa elshisin qabyldady
ASTANA. QazAqparat - Májilis spıkeri Nurlan Nyǵmatýlın Cheh Respýblıkasynyń Qazaqstandaǵy Tótenshe jáne Ókiletti elshisi Elıshka Jıgovany qabyldady, dep habarlaıdy QazAqparat.
Taraptar ekijaqty qarym-qatynasty damytýdyń ózekti suraqtaryn talqylady.
N. Nyǵmatýlın Elbasy Nursultan Nazarbaevtyń taıaýda Qazaqstan halqyna arnaǵan kezekti Joldaýyna aıryqsha nazar aýdara kelip, bizdiń elimizdiń ásirese, ınnovatsııalyq-tehnologııalyq baǵytta áriptestikti nyǵaıtýǵa degen qyzyǵýshylyǵy zor ekenine toqtaldy. Májilis tóraǵasy atap ótkendeı, bul salada Chehııa Respýblıkasynyń zańnamalyq bazasy men tájirıbesi joǵary.
Bıyl eki el arasynda dıplomatııalyq qatynastyń ornaǵanyna 25 jyl toldy. Taraptardyń pikirinshe osy ýaqyttar ishinde bizdiń elderimiz arasynda senimdi saıası únqatysý jáne barlyq salada tıimdi yqpaldastyq ornady.
Taraptar qos memleket yntymaqtastyǵynyń strategııalyq sıpatyna mán berip, parlamentaralyq yqpaldastyqty odan ári tereńdetý joldaryn jan-jaqty talqylady.
