Májilis tóraǵasy balalaryn gadjettermen aldaıtyn ata-analardy synady
ASTANA. QazAqparat - Búgin Parlament Májilisiniń tóraǵasy Nurlan Nyǵmatýlın palatanyń jalpy otyrysynda balalaryn gadjettermen aldaıtyn ata-analardy synady, dep habarlaıdy QazAqparat.
«Biz qazir beıindi komıtetpen balalarǵa aqparattyq qoljetimdilikti shekteý boıynsha zań jobasymen jumys isteýdemiz. Osy oraıda jetkinshekterdiń planshetterge, aıpadtarǵa jáne basqa da qurylǵylarǵa qoljetimdigine qatysty kóp máseleler bar. Balalar jastaıynan kitap oqyǵannyń ornyna planshettermen otyrady. Al jas ata-analar balasy mazalaryn almas úshin betinen qaqpaı suraǵanyn beredi. Balalar qolyna bergen qurylǵymen tańnan keshke deıin otyrady. Keıinnen bes jastaǵy balanyń kózi nashar kóretindigi jáne basqa da problemalary anyqtala bastaıdy. Sonymen qatar erteń Densaýlyq saqtaý mınıstrigi elimizdiń zańnamasynda tyıym salatyn normanyń joqtyǵyn alǵa tartatyn bolady», - dep atap ótti N. Nyǵmatýlın «Qazaqstan Respýblıkasynyń keıbir zańnamalyq aktilerine jarnama máseleleri boıynsha ózgerister men tolyqtyrýlar engizý týraly» zańynyń jobasyn talqylaý barysynda.
Zań jobasyna sáıkes, 5 kodekske jáne 9 zańǵa ózgerister men tolyqtyrýlar engizý kózdelip otyr. Jarnama salasynda alǵash ret ýákiletti organ (UEM) men retteýshi memlekettik organdar (AKM, IDM, ІІM, DSM) aıqyndaldy. Retteletin quqyqtyq qatynastardyń jan-jaqtylyǵyn eskere otyryp, «Ruqsattar jáne habarlamalar týraly» jáne «Ózin-ózi retteý týraly» zańdarǵa uqsas jarnama salasynda ýákiletti jáne retteýshi memlekettik organdardy aıqyndap alý eskerildi.
