Májilis tóraǵasy áıelderdiń zeınetke shyǵý jasyn tómendetýge qatysty pikir bildirdi

NUR-SULTAN. QazAqparat – Áıelderdiń zeınetke shyǵý jasyn tómendetý úshin memlekettik qarjy múmkindigin eskerý kerek. Bul týraly Májilis tóraǵasy Erlan Qoshanov aıtty, dep habarlaıdy QazAqparat tilshisi.

Búgin palatanyń jalpy otyrysynan keıin tilshiler E.Qoshanovtan áıelderdiń zeınetke shyǵý jasyn 58-ge tómendetýge qatysty suraq qoıdy.

«Bul máselege jeńil qaraýǵa bolmaıtyn shyǵar. Sebebi bul baǵytta memlekettiń múmkinshiligin de qaraý kerek. Qazirgi kezde tıisti talap-tilekter aıtylyp jatyr, onyń barlyǵyn bilemiz. Óńirlerge barǵan kezde de bul usynystar aıtyldy. Osy máselege qatysty usynystardy pysyqtaý kerek. Ol boıynsha Úkimet, tıisti quzyretti organ jumys istep jatyr. Bul rette qandaı nátıje bolatynyn aldaǵy ýaqytta kóremiz», - dedi Májilis tóraǵasy.

Budan buryn habarlanǵandaı, jaqynda senator Dana Nurjigit áıelderdiń zeınetke shyǵý jasyn 58 jasqa deıin tómendetýdi usyndy.