Májilis tóraǵasy: 30 jylda ǵasyrǵa teń keletin tabystarǵa jettik
QR Parlamenti Májilisiniń tóraǵasy Nurlan Nyǵmatýlın Táýelsizdik mereıtoıyna arnalǵan halyqaralyq konferentsııada osynda pikir bildirdi, dep habarlaıdy QazAqparat tilshisi.
«30 jyldyń ishinde jańa memleket, jańa ekonomıka, jańa qoǵam quryldy. Tarıh turǵysynan alǵanda az ǵana ýaqyt – 30 jyldyń ishinde Qazaqstan damyǵan elderdiń qataryna kirdi. Bul týraly Tuńǵysh Prezıdentimiz «Táýelsizdik taǵlymy» maqalasynda aıtqandaı, biz erekshelikterimiz ben múmkindikterimizdi eskerip, «Qazaqstan-2030» strategııasyn merziminen buryn oryndap, odan keıin «Qazaqstan-2050» baǵdarlamasyn jasadyq. Osy strategııalyq is-josparlarymyz bizdiń elimizdi úlken nátıjelerge jetkizdi. Ony álemdik saıasatkerler men sarapshylar moıyndap otyr. Búginde táýelsiz Qazaqstan óziniń myńdaǵan shaqyrym shekarasyn bekitken, dúnıejúzine taraǵan qazaqstandyqtardy bir shańyraqtyń astyna jınap, búkil álemge qajetti halyqaralyq bastamalarǵa bastamashy bolǵan tanymal, bedeldi memleket. Oǵan dálel Bizdiń Eýropadaǵy qaýipsizdik jáne yntymaqtastyq uıymyna tóraǵalyq etkenimiz», - dedi Májilis tóraǵasy.
Sondaı-aq, ol Ortalyq Azııa elderiniń ishinde alǵash bolyp Birikken Ulttar Uıymynyń Qaýipsizdik keńesine turaqty emes múshe bolǵan da Qazaqstan ekenin eske saldy.
«Búkil álemge áıgili EKSPO kórmesin uıymdastyrdyq. Bul kórme Elbasynyń eren erligimen, parasatty sheshimimen, jasampaz ıdeıasymen dúnıege kelgen astanamyz Nur-Sultan qalasynda ótti. Qazir elordamyz dúnıejúzi elderiniń arasynda dinaralyq jáne ultaralyq tatýlyq uǵymynyń saıası dıalog alańyna aınaldy. Sonymen birge búgin Nur-Sultan qalasy Táýelsizdigimizdiń máńgilik irgetasy jáne Shyǵys pen Batysty baınalystyratyn Eýrazııa órkenıteniń altyn ordasy. Al Elbasynyń taǵy bir tarıhı sheshiminiń arqasynda ashylǵan Túrkistan oblysy Eýropa men Azııany qosatyn búkil túrki áleminiń rýhanı ortalyǵy dep ataldy. Mine biz, osylaı 30 jyldyń ishinde ǵasyrǵa teń keletin tabystarǵa jettik», - dei Nurlan Nyǵmatýlın.
