Májilis tolyq jańardy – saıasattanýshy Qazbek Maıgeldınov
NUR-SULTAN. QazAqparat - Saıasattanýshy Qazbek Maıgeldınov Qazaqstandaǵy Májilis pen Máslıhattar depýtattary saılaýynyń qorytyndysy týraly pikirimen bólisti.
Sarapshy Parlamenttiń jańa quramy qol jetkizilgen qoǵamdyq-saıası kelisimniń nátıjesi ekenin atap ótti, dep habarlaıdy QazAqparat tilshisi.
«Saılaý birqalypty, jaqsy ótti. Bastapqyda-aq saılaýdy qaýipsizdik sharalary men sanıtarlyq-epıdemıologııalyq normany saqtaı otyryp ótkizý josparlanǵan. Bul elimizdegi azamattardyń saıası saýattylyǵy men joǵary uıymshyldyǵyn bildiredi», - deıdi Qazbek Maıgeldınov.
Onyń aıtýynsha, úgit-nasıhat jumystary kezinde saıası partııalar maqsatty aýdıtorııaǵa kóńil bólgen.
«7% shekten óte almaǵan partııalar kez kelgen jaǵdaıda aımaqtardaǵy pozıtsııalaryn nyǵaıtady jáne aımaqtyq kún tártibin qurýǵa belsendi qatysady. Bul saılaýdyń basty artyqshylyǵy - aımaqtardaǵy partııalardyń pozıtsııalaryn nyǵaıtý jáne aımaqtyq saıası protsesterdi jandandyrý. Bıylǵy saılaý naýqanynda biz úkimettik emes sektor men qarapaıym azamattardyń saılaýdy baıqaý úderisine zor qyzyǵýshylyǵyn baıqadyq», - deıdi ol.
Sondaı-aq, ol QR Parlamenti Májilisiniń depýtattyǵyna kandıdattardyń bekitilgen tizimine qatysty oıyn aıtty. «Nur Otan» men «Aq jol» partııasy tizimdi jarııalap qoıdy.
«Jalpy Parlamenttiń jańa quramy qol jetkizilgen qoǵamdyq-saıası kelisimniń nátıjesi. Olar Prezıdent reformalarynyń jańa paketin júzege asyrýǵa tikeleı qatysady. Bul úlken jaýapkershilikti talap etedi. Saıası reformalardyń alǵashqy paketi óz jemisin berdi. Munyń taǵy bir dáleli - turaqty saılaý protsesi. Shyn máninde, barlyq tizimder jańa kelbetke ıe. Bul Parlament Májilisiniń tolyǵymen jańarǵanynyń basty kórsetkishi. Sonymen qatar, kvotanyń 30%-y esebinen depýtattar quramy jasarady. Májilis mobıldi jáne tıimdi bolýy kerek», - deıdi saıasattanýshy.
