Májilis «Tólemder jáne tólem júıeleri týraly» zań jobasyn ekinshi oqylymda maquldady

«Zań jobasy QR Prezıdenti N. Nazarbaevtyń «Qazaqstan joly - 2050: bir maqsat, bir múdde, bir bolashaq» atty Joldaýy aıasynda, sondaı-aq Memleket basshysynyń mezettik tólemder júıesi operatorlarynyń qyzmetin retteý máselesin pysyqtaý jónindegi tapsyrmalaryn oryndaý úshin ázirlendi. Jumys tobyna 200-den astam usynystar kelip tústi.  Osy zań jobasy boıynsha kelip túsken usynystar múddeli mınıstrlikter, vedomstvolarǵa, sondaı-aq birqatar úkimettik emes uıymdar ókilderiniń qatysýymen jumys tobynyń otyrysynda jáne komıtettiń keńeıtilgen otyrysynda qaraldy», -dedi jalpy otyrys barysynda baıandama jasaǵan Májilistiń Qarjy jáne bıýdjet komıtetiniń múshesi Danııa Espaeva.

Halyqaralyq standarttardy eskere otyryp, tólem júıelerin uıymdastyrý jáne olardyń jumys isteýi, tólem qyzmetteri naryǵyn retteý máseleleri boıynsha quqyqtyq erejelerdi bekitý, sondaı-aq qoldanylatyn halyqaralyq tájirıbege sáıkes, tólemder men aýdarymdar salasyndaǵy normalardy jetildirý qajettiligi zań jobasynyń maqsaty bolyp tabylady.

Budan buryn habarlanǵandaı, QR Ulttyń banki tóraǵasy Danııar Aqyshevtyń aıtýynsha, búgingi tańda Qazaqstannyń tólem naryǵynda kúrdeli qurylymdyq ózgerister oryn alyp, naryqqa jańa banktik emes oıynshylar kelýde, jańa býyn tólem qyzmetteri de paıda bolyp jatyr. Al halyqaralyq standarttardyń enýi nátıjesinde  tólem júıesiniń tásilderi de ózgeriske ushyraǵan. «Osyǵan baılanysty tólem naryǵynyń jumys isteýi salasynda quqyqtyq negizdi qurý jáne qarym qatynastar keshendi retteý, sondaı-aq tólemder men aqsha aýdarymdar rásimderi boıynsha normalardy jetildirý maqsatynda jańa zań jobasyn ázirleý qajettiligi týyndady», - deıdi UB tóraǵasy.

Budan bólek, zań jobasy tólem qyzmetterin tutynýshylardyń múddelerin qorǵaýǵa baǵyttalady. Jalpy zań jobasyn qabyldaý tólem naryǵynyń aıqyndylyǵyn edáýir arttyrýǵa, jańa oıynshylardyń qyzmetin retteýge, tólem jasaý barysyn ońtaılandyrýǵa, sońǵy tutynýshylardyń quqyqtaryn qorǵaýdy qamtamasyz etýge múmkindik beredi.