Májilis TMD memleketteriniń shekaralyq yntymaqtastyǵy týraly konventsııany maquldady
ASTANA. Jeltoqsannyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Táýelsiz memleketter dostastyǵyna qatysýshy memleketterdiń shekaralyq yntymaqtastyǵy týraly konventsııany ratıfıkatsııalaý týraly» zań jobasyn maquldady,
dep habarlaıdy QazAqparat.
2008 jyldyń qazan aıynda Bishkek qalasynda Qazaqstan, Armenııa, Belarýs, Qyrǵyz, Reseı jáne Tájikstan basshylary atalǵan konventsııaǵa qol qoıǵan. «Bul qujattyń negizgi maqsaty TMD sheńberindegi shekaralyq yntymaqtastyqtyń quqyqtyq keńistigin qalyptastyrý bolyp tabylady. Sonymen qatar, konventsııa barlyq baǵyttar boıynsha yntymaqtastyqty damytýdy kózdeıdi. Al ony ári qaraı iske asyrý halyqarlyq kelisimsharttar jasaý arqyly júzege asyrylady. Konventsııa Belarýs, Reseı jáne Tájikstan úshin 2009 jyldyń maýsymynda kúshine engen bolatyn», dedi baıandama jasaǵan Syrtqy ister mınıstrliginiń jaýapty hatshysy Rapıl Joshybaev.
Konventsııaǵa sáıkes, shekaralyq yntymaqtastyq : egemendik, aýmaqtyń tutastyǵyn ózara qurmetteý, memlekettik shekaralarǵa qolsuqpaýshylyq, ulttyq zańnamany ózara qurmetteý, azamattardyń densaýlyǵyna jáne qorshaǵan ortaǵa zııan keltirmeý, ekonomıkalyq jáne basqa da múddelerge nuqsan keltirmeý, shekaralyq daýlardy beıbit jolmen retteý, osy konventsııaǵa qatysýshylar bolyp tabylmaıtyn TMD-ǵa qatysýshy basqa da memleketterdiń ishki isterine aralaspaý sekildi birqatar qaǵıdattarǵa negizdeledi.
Shekaralyq yntymaqtastyqqa qatysýshy memleketterdiń zańnamasyn jáne halyqaralyq quqyq normalaryn saqtaı otyryp, olardyń ókilettikteri quziretti organdar arasyndaǵy kelisimder negizinde júzege asady. Osy maqsatta shekaralyq yntymaqtastyq jónindegi birlesken organdar da qurylýy múmkin.
Májilis maquldaǵan zań jobasy Parlament Senatyna jiberiledi.
