Májilis terrorızmdi qarjylandyrýǵa qarsy is-qımyldy jaqsartýǵa qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.

Zań jobasy kiristerdi jylystatýǵa jáne terrorızmdi qarjylandyrýǵa qarsy is-qımyldyń ulttyq júıesin jaqsartý, sondaı-aq aqshany jylystatýǵa qarsy kúrestiń qarjylyq sharalaryn ázirleý tobynyń halyqaralyq standarttaryn iske asyrý maqsatynda ázirlendi (FATF).

Májilistiń Qarjy jáne bıýdjet komıtetiniń tóraǵasy, depýtat Marat Qusaıynovtyń aıtýynsha, zań jobasymen 2007 jylǵy 12 qańtardaǵy «Sáıkestendirý nómirleriniń ulttyq tizilimderi týraly», 2009 jylǵy 28 tamyzdaǵy «Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly», 2014 jylǵy 16 mamyrdaǵy «Ruqsattar jáne habarlamalar týraly», 2015 jylǵy 24 qarashadaǵy «Aqparattandyrý týraly» Qazaqstan Respýblıkasynyń Zańdaryna ózgerister men tolyqtyrýlar engiziledi.

Zań jobasynyń negizgi baǵyttary:

1. Qazaqstan Respýblıkasynyń jarııa laýazymdy adamdar júzege asyratyn aqshamen jáne ózge múlikpen operatsııalar boıynsha tıisti baqylaýdy zańnamalyq deńgeıde belgileý bolyp otyr. Bul norma qarjylyq ashyqtyqqa qol jetkizýge jáne saıası mańyzy bar laýazymdy adamdardyń senip tapsyrylǵan ókilettikterin paıdalanýyna baılanysty quqyq buzýshylyqtardyń yqtımal jolyn kesýge baǵyttalǵan;

2. Tsıfrlyq aktıvterdi shyǵarýdy, olardyń saýda-sattyǵyn uıymdastyrýdy, sondaı-aq tsıfrlyq aktıvterdi aqshaǵa, qundylyqtarǵa jáne ózge de múlikke aıyrbastaý boıynsha qyzmetter kórsetýdi júzege asyratyn adamdardy qarjy monıtorıngi sýbektilerine jatqyzý.

3. Mekemeniń zańdy ıesi týraly málimetterdiń ashyqtyǵyn (tikeleı nemese janama) belgileý maqsatynda Qarjy monıtorıngi jónindegi ýákiletti organǵa bıznes-sáıkestendirý nómirleriniń ulttyq tiziliminiń derekterine qol jetkizýdi usyný.

Buǵan qosa, FATF usynymdaryn tolyq ımplementatsııalaý maqsatynda QR Qarjy naryǵyn retteý jáne damytý agenttigimen jáne QR Ulttyq bankimen kelisim boıynsha qarjy monıtorınginiń belgili bir sýbektileriniń (qarjy uıymdarynyń) benefıtsıarlyq menshik ıeleri týraly málimetterdi usyný nysanyn belgileýdi kózdeıtin qarjy monıtorıngi ýákiletti organynyń túzetýleri usynylady.

Talqylaýdan keıin palata depýtattary atalǵan qujatty maquldady.

Májilis tóraǵasy Nurlan Nyǵmatýlın qylmystyq jolmen alynǵan kiristerdi jylystatýǵa jáne terrorızmdi qarjylandyrýǵa qylmyskerler tarapynan áreket jasaýy búkilálemdik problema ekenin atap ótti.

«Ony boldyrmaý úshin jáne aldyn alý baǵytynda árqashan qajetti ári tıimdi is-sharalardy qolǵa alý kerek. Sol úshin Parlament depýtattary ózderi bastamashy bolyp, osy zań jobasyn ázirledi. Bul óz kezeginde atalǵan qylmysqa qarsy memlekettik organdardyń qyzmetin kúsheıtýge jáne nátıjesin arttyrýǵa jańa múmkindik beredi dep senemiz», - dedi N. Nyǵmatýlın.