Májilis teńizshilerdiń jeke kýálikteri týraly konventsııany maquldady
ASTANA. Qańtardyń 27-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Halyqaralyq eńbek uıymynyń Teńizshilerdiń jeke kýálikteri týraly № 185 (qaıta qaralǵan konventsııasyn ratıfıkatsııalaý týraly) zań jobasyn maquldady,
dep habarlaıdy QazAqparat.
Atalǵan konventsııa 2003 jylǵy maýsymnyń 19-ynda Jenevada qabyldanǵan bolatyn. Konventsııa boıynsha ózgeshe erejeler kózdelmese, onda teńizshilerdiń jeke kýálikterin berý ulttyq zańnamada jáne jol júrý qujattaryn berýge qatysty ózge de normatıvtik- quqyqtyq aktilerde kózdelgen talaptarǵa baǵyndyrylýy qarastyrylady. Budan basqa, konventsııaǵa qatysýshy árbir memleket teńizshilerdiń jeke kýálikterin negizsiz keshiktirmeı berýdi qamtamasyz etetin bolady. Sonymen birge, qujat konventsııaǵa qatysýshy árbir memlekettiń bosqyndarǵa nemese azamattyǵy joq adamdarǵa qatysty halyqaralyq erejelerden týyndaıtyn óz mindettemelerin oryndaýyna kedergi keltirmeıdi.
Qujat boıynsha jaǵalaýǵa demalysqa shyǵý úshin teńizshige vıza alý talap etilmeıdi. Al bundaı talapty oryndaýǵa múmkindigi joq árbir memleket onyń zańnamasynda nemese qoldanylyp júrgen tájirıbesinde negizinen osy talapqa saı keletin rásimder kózdelýin qamtamasyz etýleri tıis.
Májilis maquldaǵan zań jobasy Parlament Senatyna jiberiledi.
