Májilis teńgemen salynǵan depozıtke kepildendirilgen tólemdi 5-ten 10 mln. teńgege ósirý týraly norma qabyldady
ASTANA. QazAqpart - Májilis teńgemen salynǵan depozıtke kepildendirilgen tólemdi 5-ten 10 mln. teńgege ósirý týraly norma qabyldady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty Nurtaı Sabılıanov aıtty.
«Elbasy Úkimettiń keńeıtilgen otyrysynda halyqtyń kókeıinde júrgen kóptegen suraqtarǵa, qordalanǵan máselelerge jaýabyn berdi. Eń birinshisi, el oıynda júrgen teńge baǵamynyń kúrt aýytqýy bola ma, bolmaı ma, degen suraqqa tolyq jaýap aldy. Memleket basshysy teńge baǵamynyń kúrt aýytqýyn boldyrmaımyz dep aıtty. Endi osyny paıdalanyp, ózimizdiń kásipkerlikti, jalpy ekonomıkamyzdy damytýymyz kerek», - dedi depýtat.
Onyń atap ótýinshe, osyǵan baılanysty Parlament Májilisinde teńgemen salynǵan halyqtyń depozıtine beriletin kepildendirilgen tólemdi 5 mıllıon teńgeden 10 mln. teńgege ósirý týraly norma qabyldaǵan.
«Bul da, menińshe, ózimizdiń ulttyq valıýtaǵa degen úlken qoldaý, zor senim. Bárimiz de qoldanystaǵy ulttyq valıýtamyzdy qoldaýymyz kerek. Sol arqyly tólem jasaýymyz, salymdarymyzdy teńgemen saqtaýymyz qajet dep olaımyn», - dedi N.Sabılıanov.
